7 opisina ng Masbate PNP, naabo

LEGAZPI CITY, Albay, Philippines – Umaabot sa milyong halaga ng ari-arian ang naabo makaraang masunog ang gusali ng pitong opisina ng Masbate PNP Provincial Command sa loob ng Camp Bonny Serrano sa Masbate City kahapon ng madaling araw.

Sa ulat na ipinarating ni Masbate PNP Provincial Director P/Senior Supt. Jerry Biares sa Camp Simeon Ola, dakong ala-1:30 ng madaling araw, nagulantang ang mga nagbabantay na pulis sa loob ng kampo nang makitang naglalagablab na ang gusali ng Police Community Relation Branch, Intellligence Branch, Supply Branch, WCPD Office, Provincial Internal Affairs Service office, NAPOLCOM office at opisina ng Masbate PNP Crime Lab.

Kaagad na rumesponde ang mga tauhan ng pamatay-sunog ng Masbate Provincial Fire Marshall kung saan naapula ang sunog bandang alas-5 ng umaga.

Nabatid na ilang putok ng bala ng baril na sinasabing nakaimbak ang nadamay sa sunog.

Dahil sa sunog nawalan ng kuryente ang buong Masbate City.

Patuloy naman imbestigasyon kung saan inaalam pa ang danyos ng sunog.