Nasunugan sa CICC mag-pasko

CEBU, Philippines - Hayan magsaulog sa Pasko ug Bag-ong Tuig sa kasamtangan nilang gipuy-an sa nataran sa Cebu International Convention Center sa Dakbayan sa Mandaue ang kapin 1,000 ka pamilya nga nasunugan sa Barangay Mantuyong ug Guizo.

Si Mayor Gabriel Luis “Luigi” Quisumbing niingon nga ang mga biktima magpabilin sa ilang pagpuyo sa maong lugar sanglit nagpadayon pa ang kaugmaran sa luna nga ilang balhinan.

"It will likely be after Christmas na," matud ni Quisumbing.

Gitahasan ang iyang chief of staff nga si Atty. Mae Elaine Bathan sa pagtan-aw sa lugar nga mahimo nga kabalhinan sa mga biktima nga beneficiary sa 9.2-hectare relocation site.

"We target to transfer some before year ends," matud ni Bathan.

Matud niya nga ang Beneficiary Selection Committee naghimo na sa pag-validate sa mga beneficiaries.

Sa nasayran nga ang komitiba ang nakapahigayon na sa pag-validate sa 315 ka beneficiaries gikan sa 887 ka pamilya sa Guizo ug Mantuyong.

Mokabat sa 500 ka panimalay ang naugdaw sa nahitabong sunog sa duha ka barangay sa dakbayan niadtong Marso.

Temporaryo nilang gipuy-an ang kasikbit nga CICC nga wala na magamit human naguba sa linog ug bagyo samtang ang kagamhanan sa dakbayan ang nagpadayon pa sa re-blocking sa luna nga gipuy-an nga nalakip sa 9.2-hectare nga luna sa kagamhanan nga gidonar ngadto sa mga molupyo sa panahon pa ni anhing mayor Alfredo Ouano. (BANAT NEWS)