Contractor patay sa ambush

MANILA, Philippines – Utas ang isang contractor makaraang pagbabarilin ng riding-in-tandem, kamakalawa ng gabi sa Malabon City.

Dead-on-the-spot ang biktimang si Arnaldo Hizon, 41, nakatira sa Brgy. Niugan ng naturang lungsod sanhi ng tinamong ilang tama ng bala sa ulo at katawan buhat sa isang kalibre .45 pistol.

Blanko pa ang pulisya sa pagkakakilanlan ng mga suspect at nagsasagawa pa sila ng follow-up hinggil sa insidente.

Ayon kay Malabon City Police Station Investigation Division Police Insp. Paul Dennis Javier, naganap ang insidente alas-9:30 ng gabi sa kahabaan ng Pilapil C. Perez St.,  ng naturang siyudad.

Minamaneho ng biktima ang kanyang motorsiklo at habang binabagtas nito ang naturang lugar ay biglang humarang   sa kanya ang  isang motorsiklong walang plaka sakay ang dalawang kalalakihan.

Walang salitang pinagbabaril ang biktima na naging dahilan ng agaran nitong kamatayan habang ang mga suspect ay mabilis na tumakas patungong Brgy. Tonsuya ng naturang lungsod.

Ayon sa Malabon City Police ay palaisipan pa sa kanila ang ginawang pamamaslang sa biktima habang  nagsasagawa na sila ngayon ng malalimang imbestigasyon.