Kagawad sa barangay gi-ambush patay

CEBU, Philippines - Dead on the spot ang usa ka konsehal sa barangay nga anaa sa drugs watchlist sa kapulisan  human kini gipusil samtang nagmaniho sa iyang motorsiklo diha sa Sitio Fatima, Brgy. Jubay sa Lungsod sa Liloan sa nakalabay nga gabii.

Ang konsehal giila nga si Erwin Sarmiento, 50, konsehal sa Barangay Jubay sa maong lungsod.

Ang desk officer sa Liloan Police nga si Police Officer 2 Eric Pentoy miingon nga nagsakay sa motorsiklo ang biktima dihang kalit kini gitaparan sa laing motorsiklo nga dunay sakay nga duha ka lalaki ug ang back rider nipusil kaniya sa makadaghang higayon.

Atol sa pagpamusil laing motorista nga si Charise Balverde ang naigo sab sa saag nga bala sa iyang paa nga gidala sab dayon sa Vicente Sotto Memorial Medical Center.

Si Pentoy miingon nga mitahan na sa Oplan Tukhang ang biktima   niadtong Hulyo 7. Sa pagkakaron anggulo sa illegal drugs ang usa sa gisubay nilang motibo sa maong hitabo, apan wala sab nila gipadaplin ang uban pa nga posibling anggulo sa maong krimen. Jojo C. Ugdol ug Rowena Capistrano (BANAT NEWS)