P12.4M shabu nasakmit

CEBU, Philippines - Usa ka kilo nga shabu nga kantidad og kapin P11 Milyones ang nasakmit sa mga sakop sa Philippine Drug Enforcement Agency (PDEA)-7 gikan sa usa ka nangangkong youth leader sa usa ka simbahan ug kanhi  sakop sa banda atol sa gihimo nga buy-bust operation diha sa gawas sa usa ka mall sa Cebu Business Park sa nakalabay nga gabii.

Ang dinakpan giila nga si Jerome Fat Sosmeña, 30, taga Brgy. Luz ning Dakbayan sa Sugbo kinsa nalakip sa listahan sa PDEA-7 sa mga high value targets niini.

Ang director sa PDEA-7, Dir. Yogi Ruiz nga nahinabi sa mga tigbalita nagkanayon nga ilang gipalitan og bale P110 mil nga shabu ang suspek bugti sa 50 gramos nga shabu ug nagkasabot silang magkita sa nahisgutang dapit.

Matud pang Ruiz nga segurista kaayo si Sosmeña atol pa lang sa ilang sabot-sabot kay gusto niya nga litratohan ang kwarta nga ibayad kaniya ug makadaghan usab nagilis-ilis og lugar  kun asa sila magkita.

Unang nakuha sa mga ahente ang 50 gramos nga shabu apan sa pagrekisa sa dala niining bag, aduna kini laing dala nga dagkong putos sa drugas.

 Ang tanan mitimbang og usa ka kilo nga P4 Milyones ang kantidad apan kun basehan sa presyo sa Dangerous Drugs Board (DDB) value nga P11,800 kada gramo, ang maong shabu mokantidad og kapin P11.8 Milyones.

Gawas sa mga shabu nakuha sab sa taga PDEA-7 ang daghang mga resibo sa remittance centers.

Sa impormasyon nga nakuha ni Ruiz naggikan sa Muntinlupa ang supply sa drugas ni Sosmeña ug kini ang hagbonganan sa mga shabu nga ipakatap sa Sugbo.

Si Ruiz miingon nga misulod sa negosyo sa drugas si Sosmeña human nangamatay ang mga dagkong drug lords ug pushers sa Sugbo.

Ang mga higala ni Sosmeña nga nahinabi sa Banat News miingon nga dili sila makatuo nga nalambigit kini sa drugas. Gani usa kanila usa ka babaye  miingon nga kauban sila niini sa simbahan, aktibo sa mga kalihokan sa kabataan ug buotan ang ilang pagkaila niini. Sulay pa unta nga gikuhaan og pamahayag sa mga tigbalita si Sosmeña apan kini nagdumili na sa pagtingog.

Samtang sa laing operasyon sa PDEA-7 usa ka on-duty nga gwardiya sa Mactan Cebu International Airport (MCIA) ang nadakpan human gikatahong nasakpan nga nagsuyop og shabu sulod sa usa ka abandonadong establisemento sa MCIAA Building , Airport Road, Pusok sa Dakbayan sa Lapu-Lapu sa nakalabay nga gabii.

Ang dinakpan giila nga si Gilbert Jatico nga nadestino sa maong tugpahaan.

Target unta sa PDEA-7 mao si alyas Kokoy apan nakasibat.  Nakuha gikan sa guwardiya ang tulo ka pakete sa shabu ug drug paraphernalia.

Sa laing operasyon, sa PIB sa Cebu Provincial Police Office, duha ka mga tawo ang nadakpan  diha sa Poblacion East sa Lungsod sa Moalboal.

Ang duha giila nga sila si Flor Ariel Albarracin, alyas Boy Gunding nga maoy target sa operasyon ug usa ka Victor Limpag Tsokemata.

Nakuha gikan sa duha ang 26 gramos nga kantidad sa drugas nga mikantidad og P306, 800. Jojo C. Ugdol ug Rowena Capistrano (BANAT NEWS)