Duterte hindi magpapa-‘tuta’ sa kahit anong bansa
MANILA, Philippines – Siniguro kahapon ni Pangulong Rodrigo Duterte na hindi ito magpapa-”tuta” sa kahit kaninong bansa bagkus ay magiging tuta lamang siya ng mga Filipino.
Ito ang binigyang-diin ng Pangulo sa kanyang departure speech bago tumulak patungong Tokyo, Japan para sa kanyang 3-araw na official visit.
“I am not a ‘tuta’ of any country. Ang puwede lang magtuta sa akin ay ang mga Pilipino,” giit ni Duterte sa kanyang mensahe kahapon bago sumakay sa Philippine Airlines (PAL) flight 001 sa NAIA terminal 2.
Sinabi ng Pangulo, mananatili ang pagpapatupad niya ng independent foreign policy at hindi siya pabor na magkaroon ng panibagong Visiting Forces Agreement (VFA) sa ibang bansa.
Aniya, hindi naman kailangan ng Pilipinas ang ganitong mga kasunduan dahil wala naman tayong planong pumasok sa giyera.
Idinagdag pa ni Duterte, pangarap niya na isang araw ay makita na tanging mga sundalong Filipino lamang ang nasa Pilipinas at walang mga dayuhang sundalo.
Kamakailan ay sinabi ni Duterte sa pagbisita niya sa Beijing, China na ‘hiwalay’ na ang bansa at USA pagdating sa usapin ng military at economic ties.
Samantala, sinabi ni Duterte na hindi niya muna masasabi ang mga pangalan ng nasa narco list dahil napakarami nito may mga Barangay Captains, Mayor, Congressman, mga artista, pushers at users sa listahan.
Ayon kay Duterte, sa dami ng mga gumagamit ng ipinagbabawal na gamot at kundi ito mapipigilan babagsak ang Pilipinas at ang mga kinabukasan ng mga bata ay malalagay sa alanganin.
- Latest