Nangahubog, ig-agaw gidunggab

CEBU, Philippines - Grabeng naangol ang 29-anyos nga lalaki nga gidunggab sa gikainom niining ig-agaw sa Barangay Sacsac, Lungsod sa Consolacion alas 12 pasado sa niaging tungang gabii.

Si Police Officer 1 Retchie Gilleran sa Consolacion Police Station niila sa biktima nga si Wendell Cantano, ulitawo, ug ang nagdunggab mao si Rudy Mar Cantano, 20-anyos, pulos nagpuyo sa maong dapit.

Matud ni Gelliran nga sayo pa sa gabii nag-inom ang duha ka manag-agaw apan dihang nangahubog na kalit lang nitumaw ang ilang panaglalis.

Dugang pa ni Gelliran nga taliwala sa mainiton nilang panaglalis, ang suspek nga wala na kapugong sa iyang kasuko nikuha og kutsilyo dayon gidunggab niini ang biktima sa bukobuko.

Ang mga sakop sa pamilya sa biktima dali nga nidala sa Mendaro Hospital sa maong lungsod apan gibalhin sa Vicente Sotto Memorial Medical Center sa Dakbayan sa Sugbo.

Si Gelliran niingon nga dihang ilang gitubag ang alarma wala na nila naabti ang suspek kinsa giingong dali sab nga nakasibat pahilayo human sa maong hitabo. (BANAT NEWS)