Gipusil gawas sa diskohan
CEBU, Philippines - Patay ang 22-anyos nga lalaki nga nitambong og disco human gipusil sa upat ka wala hiilhing tawo nga nagtabon og panapton sa ilang mga nawong alas 11 pasado sa niaging gabii sa Alegria, Lungsod sa Cordova.
Si Senior Police Officer 1 Laurencio Wagwag sa Cordova Police Station niila sa biktima nga si Barkley Dico, taga Barangay San Miguel sa maong lungsod.
Matud ni Wagwag nga ang biktima kuyog sa iyang mga higala nga nanggawas gikan sa gym sa nahisgutang barangay.
Samtang nakigkukabildo ang biktima sa iyang mga higala kalit lang nitumaw ang duha ka motorsiklo nga giluwanan sa upat ka tawo.
Ang mga backrider maoy niibot og armas dayon nagtinabangay sa pagpamusil ug nagdali sa pagsibat.
Dali untang gidala ang biktima sa Lapu-Lapu City Hospital apan gideklarar kini sa mga doktor nga dead-on-arrival.
Giingong lider sa gang sa mga batan-on ang biktima ug mao kini ang gisubay nga anggulo sa kapolisan.
Matud ni Wagwag nga ilang gisalikway ang kalambigitan sa ilegal nga drugas tungod kay ang biktima wala sa ilang listahan. (BANAT NEWS)
- Latest