Sundawo, polis hapit magkapinusilay

CEBU, Philippines - Sa prisohan  sa Carmen Police Station natugpa ang duha ka sundawo ug usa ka drayber sa wing van human sa komosyon nga nahitabo ug ginukdanay dihang nagkabikil sa dalan pasado alas 5 niadtong nakalabay nga hapon.

Atol sa hitabo gamay na lang ang kuwang nga magkapinusilay na unta dihang nakita sa mga polis nga nagbitbit og armas ang usa ka sundawo nga nagsibilyan ug nangulata.

Ang duha ka sundawo giila nga sila si CPL Jay-R Telesforo, 38, taga Tugas, Mambusao, Capiz ug CPL Arthur Azarcon, 31, taga Calagdaan, Cantilan, Surigao del Sur nga parehong nadestino sa 32nd CMO Company, sa Dancar, Dunggo-an, Dakbayan sa Danao.

Samtang ang drayber sa wing van mao si Michael Barcon ug kauban ang iyang truck boy nga si Christopher Duterte, 40, nga taga Sagay City, Negros Occidental.

Matud ni Senior Police Officer 3 Danilo Laurente, desk officer sa Carmen Police Station, nga pag-abot sa Guinsay, Danao, ni-overtake ang wing van sa motorsiklo nga gisakyan sa duha ka sundawo ug gikatahong nibosina og kusog hinungdan nga nakuratan ang duha ka sundawo.

Ang duha nipasangil nga nawad-an sila sa kontrol ug nasaghiran sila sa wing van hinungdan nga ila kining gigukod ug gipahunong.

Ang truck boy nitug-an sab nga sa dihang gipahunong sila, suway nga giablihan ni Telesforo ang pultahan sa iyang gilingkuran ug pugsanon kini nga gibira apan nakapabulhot og balik ang drayber sa truck ug nahitabo na sab ang ginukuray.

Sa kahadlok sa drayber ug truck boy, nangita sila og labing duol nga police station ug pag-abot sa Lungsod sa Carmen, tayming sab nga maoy paggawas sa patrol car diin sakay ang hepe nga si Chief Insp. Christian Torres ug deputy chief nga si SPO4 Renerio Masocol Jr.

Dali nga nanaug ug nidagan duol sa patrol car ang truck boy samtang nagsunod sab ang duha ka sundawo nga nagbitbit sa armas.

Ang drayber sa wing van ang gikatahong gibunal-bunalan sa armas ni Telesforo ug nigukod sab sa truck boy.

Bisan og anaa na ang mga polis giingong gihapak gihapon sa armas ang truck boy hinungdan nga dali sab nga nibunot sa armas ang hepe sa Carmen Police Station ug gitionan ang sundawo.

Sigun pa ni Laurente nga gamay na lang gyud ang kuwang ug diriyot gyud nga nagkapinusilay kay wala kahibawo ang mga polis nga sundawo ang ilang kaatubang.

Human nag-abot na sa police station ang duha ka habig, ang drayber sa wing van nga nakaangkon og daghang bun-og sa nawong ang nakahukom nga dili na lang mopasaka og kaso sa mga sundawo kay pareho ra sab sila nga mga Ilonggo apan ang truck boy niini ang porsigido gyud nga mopasaka og kaso gumikan sa iyang kalagot giapil sab og bunal sa armas nga unta truck boy ra man siya.

Human nireklamo ang truck boy, nibawos sab og reklamo ang mga sundalo batok sa drayber sa wing van gumikan sa kasong reckless driving hinungdan nga ang tulo pareho nga natanggong sa prisohan.

Narekober sa mga polis gikan ni Telesforo ang usa ka .45 caliber pistol nga dunay magazine ug pito ka bala.

Karong adlawa ipasaka sa mga polis ang reklamo batok sa duha ka sundalo lakip na sa kaso batok sa drayber sa wing van. (BANAT NEWS)