CentCom aktibo vs illegal drugs
CEBU, Philippines - Hugot nga kampanya batok sa ilegal nga drugas nga gipahigayon sa Armed Forces of the Philippines sa Central Command niresulta sa kamatayon sa walo ka tawo ug pagkasikop sa pipila lakip ang pagkonpiskar sa mga drugas ug armas.
Kini ang gitug-an ni Major. Lino Araya Jr. sa Centcom nga nahinabi sa Banat News. Matud pa ni Araya may kamanduan si Presidente Rodrigo Duterte sa AFP nga tabangan ang kapulisan ug ang Philippine Drug Enforcement Agency sa kampanya batok sa ilegal nga drugas.
Sumala pa niya sa kinatibuk-an nakahimo na sila og 435 intelligence operations, 173 joint-direct actions/operations, 64 civic military operations ug 15 ka warrants of arrest ang ilang nahatud batok sa mga kriminal.
Si Araya nibutyag sa ilang suporta sa PNP gikan Hulyo niresulta sa kamatayon sa walo ka tawo diin ang pinakabag-o kadtong duha ka tawo sa Dakbayan sa Talisay.
Nakatampo usab sila sa pag-aresto sa 50 ka mga tawo, 311 nitahan, nakasakmit og 25 ka armas, 24 ka explosives, 449 ka putos nga shabu ug 18,256 ka mga tanom sa marijuana gikan sa Balamban, Danao ug Badian.
Samtang lima ang nadakpan ug mokapin sa P200 mil nga kantidad sa gituohang shabu ang nasakmit sa mga sakop sa Philippine Drug Enforcement Agency (PDEA)-7 uban sa kapolisan sa managlahing operasyon.
Kagahapon sa buntag nadakpan sa mga sakop sa PDEA-7 uban sa mga sakop sa Regional Anti-Illegal Drugs Special Operations Task Group (RAIDSOTG)-7, Regional Special Operations Group (RSOG)-7 ang usa ka 55 anyos nga babaye nga nalista sa “priority target list” sa PDEA-7 diha sa A. Lopez Street, Brgy. Calamba ning Dakbayan sa Sugbo.
Ang dinakpan giila nga si Rosalia Villanueva Arabis, alyas Saling nga nagpuyo sa maong dapit kinsa gibutyag ni PDEA-7 Public Information Officer Leia Albiar nga makabaligya og 50 hangtod 100 ka gramos nga shabu matag semana ug kini konektado sa usa ka dakong illegal drugs group dinhi sa rehiyon.
Niadtong nakalabay nga adlaw, upat ka mga tawo ang nasikop diha sa F. Ramos Street ning Dakbayan sa Sugbo.
Ang mga nadakpan giila nga sila si Jerry Tan Lim, 44, tag-iya sa balay, Mark Ang Lim, 42; Alexander Calderon Go, 52; ug Fernando Calderon Go, 46.
Nakuha sa mga operatiba ang lima ka dagkong putos sa gituohang shabu nga mitimbang og 70 gramos nga nagkantidad og P250 mil.
Lakip sa nakuha gawas sa mga shabu ang mga nagkadaiyang drug paraphernalia, duha ka syringes ug usa ka selpon. Jojo C. Ugdol ug Rowena Capistrano (BANAT NEWS)
- Latest