Nakigpinusilay sa polis patay

CEBU, Philippines - Dead on arrival sa Cebu Provincial Hospital sa Dakbayan sa Bogo ang giingong kanhi sinaligan sa usa ka iladong drug personality sa lungsod sa Medellin human kini misukol sa mga polis sa dihang gialarma nga armado diha sa Brgy. Poblacion, Medellin sa nakalabay nga gabie.

Ang suspetsado giila nga si Warren De Leon, temporaryo nga nagpuyo sa Daanlungsod, Medellin apan lumad nga taga Brgy. Duljo-Fatima sa Dakbayan sa Sugbo.

Matud pa ni Police Officer 1 Marlon Montesclaros sa Medellin Police nga nahinabi sa Banat News adunay nisumbong kanila bahin sa armadong lalaki nga ang mga kauban nakakita og gubot sulod sa sports complex sa ilang lungsod atol sa lingaw-lingaw nga gihimo agi sa pagsaulog sa pista sa maong dapit.

Dali sab sila nga miresponde apan sa dihang nakakita sa mga polis ang grupo ni De Leon paspas kini nga misakay sa usa ka motorsiklo ug mipabulhot sa pagpadagan. Kauban ni De Leon sila si Mark Liven Gunhuran, 30, ug Wendell Joromo nga pulos taga Daanlungsod.Naabot sa sementeryo sa Brgy. Daanlungsod ang ginukoray sa kapulisan ug sa mga suspetsado hangtod nga natumba ang ilang gisakyan nga motorsiklo. 

Sumala pa ni Montesclaros nga unang nakabangon si De Leon ug paingon na unta nga midagan. Apan sa dihang kini gisinggitan sa paghunong ug dili molihok kalit lang kini mibunot sa dala niini nga .357 revolver hinungdan nga kini gi-unhan sa pagpusil igo sa ulo. Dali pa unta kini nga gitabang apan nakabsan gayod sa kinabuhi.

Matud pa ni Montesclaros ang mga kauban ni De Leon nakakita usab og away sa nakalabay nga gabii diha gihapon sa kalingawan ug sa ilang pagbalik ilaha nang gidala si De Leon ug nagduda sila nga mobawos ang tumong sa grupo niini.

Si Montesclaros mikompirmar nga kanhi sinaligan sa usa ka notadong drug personality sa ilang dapit si De Leon apan ang iyang agalon namatay niadtong nakalabay nga tuig gumikan sa sakit. (BANAT NEWS)