Pacquiao lumipad na patungong L.A.

MANILA, Philippines – Nakatakdang umalis kagabi si Manny Pacquiao patungong United States para sa huling bahagi ng kanyang pagsasanay sa paghahamon kay welterweight king Jessie Vargas.

“I am excited to climb and fight atop the ring once again. I really miss boxing,” wika ni Pacquiao sa panayam ng Philboxing.com noong Biyernes ng gabi.

Halos apat na linggo ang naging training camp ng Filipino world eight-division champion sa Pilipinas kasama sina chief trainer Freddie Roach at assistant Buboy Fernandez.

Para hindi maabala ng kanyang mga fans ay ipinasara ni Roach sa publiko ang pag-eensayo ni Pacquiao sa Elorde Boxing Gym sa Pasay City.

Ito rin ang direktiba ng Hall of Fame trainer sa kanilang training camp ng 37-anyos na Senador sa Wild Card Boxing Gym sa Hollywood, California.

“We have to do this to ensure he doesn’t get sick a few days before the Nov. 5 fight against Vargas. Coach Freddie had been complaining about the presence of many people at the gym during the training session,” sabi ni Michael Koncz, ang Canadian adviser ni Pacquiao na matatandaang nagkaroon ng sipon at dalawang araw hindi nakapag-ensayo.

Magpapatuloy ang sparring session ni Pacquiao sa Wild Card Gym sa Martes laban kay undefeated light welterweight boxer Jose Ramirez at isa pang sparring mate na kukunin ni Roach.

Hangad ni Pacquiao (58-6-2, 38 KOs) na agawin sa 27-anyos na si Vargas (27-1-0, 10 KOs) ang suot nitong World Boxing Organization wel-terweight belt.

Nakamit ni Vargas ang WBO title, binitawan ni Timothy Bradley, Jr. para sa kanilang ikatlong paghaharap ni Pacquiao noong Abril 9, matapos talunin si Sadam Ali noong Marso.

Nasa undercard ng bakbakan nina Paquiao at Vargas ang pagdedepensa ni Nonito ‘The Filipino Flash’ Donaire, Jr. (37-3-0, 24 KOs) ng kanyang suot nitong WBO super bantamweight crown laban kay challenger Jessie Magdaleno (23-0-0, 17 KOs).