Belo kuhaon nga first pick sa Blackwater sa pba rookie draft

CEBU, Philippines - Ang Blackwater Elite  mipahibalo nga si Mac Belo maoy ilang  top pick sa PBA Rookie Draft 2016  sunod Domingo didto sa Robinsons Place Manila.

Ang Blackwater nga maoy adunay katungod nga mokuha sa No.1 pick sa PBA special draft alang sa Gilas Pilipinas players ug regular draft miingon nga ang forward nga si Belo mao gyud ilang kuhaon.

Si  Belo usa sa mga leading scorer sa Gilas Pilipinas cadet nga miduwa sa miaging FIBA Asia Challenge didto sa Iran.

Si Blackwater team owner Dioceldo Sy nagkanayon nga dili nila usikan ang ilang draft rights ug gusto nila nga makuha si Belo nga  haom ug labing lig-ong bigman nga anaa sa lista sa mga Gilas cadet players.   Wala pa hinuon mipakanaog og desisyon  si Sy  kun kinsa ilang No.1 pick regular draft nga pagasalmotan sa mga kanhi collegiate players ug  sa PBA D-League. Gawas ni Belo, laing  giinitan sa mga PBA teams sa special draft mao sila si Jio Jalalon, Kevin Ferrer, Arnold Van Opstal, Ed Daquiaog ug Cebuano Roger Pogoy. (BANAT NEWS)