GCM knights kampiyon sa gaisano Countrymall Caging
CEBU, Philippines - Naglumpayat sa kalipay ang tibuok kampo sa GCM Knights human makaeskapo bitbit ang 44-42 nga kadaugan batok sa Bagger aron pagsakmit sa korona sa Gaisano Countrymall Employees Basketball Tournament 2016 niadtong Huwebes sa gabii sa hardcourt sa maong mall.
Higpit kaayo ang maong duwa sa sinugdanan ug didto na maklaro ang kadaugan sa GCM Knights sa himalatyong segundos.
Ang free throws ni Jonathan Rosales maoy miluwas sa GCM Knights aron dal-on ang ganting salapi ug championship trophy.
Gawas sa iyang pagluwas sa GCM Knights, iya sab nga gipangulohan ang kadaugan pinaagi sa 10 puntos nga nakakabig sa organizers pagpili kaniya isip most valuable player.
Nakatabla unta ang Bagger, 40-all sa nahabiling 39 segundos sa duwa sa lay-up ni Marnel Ngoho nga nakapahinam sa aksiyon, apan si Rosales mitusak og duha ka free throws aron paabantihon ang GCM Knights, 42-40. Misamot ka kulbahinam ang duwa dihang nagtabla na sab ang iskor, 42-all sa basket ni Macky Maquilan ug posible untang makawat nila ang daog, apan si Ngoho nakahimo og turnover sa nahabiling 10 segundos nga nakapahugno sa Bagger.
Ang katapusang duha ka free throws ni Rosales maoy hingpit nga mipadaog sa GCM Knights.
Sa pasiunang duwa, ang Merchant yano kaayong miiskor og daog pinaagi sa paglubong sa Mandarin, 47-31 aron mopahiluna sa ikatulong puwesto.
Ang torneyo ubos sa superbisyon ni league commissioner Jerry Suerte sa abag ni Nestor Sullano isip committee.
Nahimong posible ug nagmalampuson ang liga tungod sa wa’y puas nga suporta gikan nilang Engr. Ron Heralve, Abaca general manager Gleen Ylanan, Annie Rapal ug Cineplex manager Ivy Flores.
Puntos matag usa
Unang duwa:
MERCHANT (47) – Albarico 9, Cabusas 8, Revus 6, Tienes 5, Frias 4, Bantillan 4, Econar 3, Ybias 2, Yanyan 2, Amora 2, Ouano 2.
MANDARIN (31) – J. Negro 7, Caramonte 6, Mamboy 4, L. Claudia 4, Renante 4, J. Villaceran 4, R. Negro 2.
Ikaduhang duwa:
GCM KNIGHTS (44) –Rosales 10, Alin 8, Jennie 6, Sialongo 4, Estomo 3, Rallos 2, Bromeda 2, Sollano 2, Delima 2, Jedjil 2, Bentulan 2, Ornopia 1.
BAGGER (42) – Ngoho 7, Sereno 7, Maquilan 6, Yaon 3, Ephan 2, Tumapon 2, Eliot 2, Ryan 2, Furog 2, Tonilon 2, Nonay 2, Primor 2, Cardente 1, Regala 1, Sellar 1. (BANAT NEWS)
- Latest