Talisay mopalit og modernong ambulansiya

CEBU, Philippines - Mopalit ang kagamhanan sa Dakbayan sa Talisay og daku ug kompleto nga ambulansiya nga magamit sa City Disaster Risk Reduction and Management Office sa pagtabang sa emerhensiya.

Si Alvin Santillana, pangulo sa CDRRMO, nagkanayon nga ang gipaabot nila nga ambulansiya ang gitawag nga ambu-van ug nga 16 -seater ang gidak-on.

Kini kompleto sa mga kahimanan sa pagtambal sa tawo nga na-trauma, vehicular accidents, gipang-atake ug uban pa.

Matud ni Santillana nga sa pagkakaron ang sakyanan sa bombero ang gigamit sa pagresponde sa mga emerhensiya tungod kay pulos guba ang mga ambulansiya sa siyudad.

Iyang gipaningkamutan nga makuha ang ambulansiya nga naguba aron naa silay magamit.

Nagkanayon si Santillana nga ang ambu-van maoy iyang gipanghambog tungod sa kanindot niini ug epektibo nga ambulansiya sa paghatag og serbisyo sa mga tawo nga nanginahanglan.

Posibleng sunod buwan magamit na ang maong ambulansiya.

Samtang gipatas-an sa kagamhanan sa siyudad ang binuwan nga madawat sa mga barangay health workers (BHW).

Si Konsehal Richard Francis Aznar, chairman sa committee on health and hospital services, niingon nga moabot sa 200 ka BHWs ang nagdawatan lang og P700 matag buwan.

Pinaagi sa iyang resolusyon nga gipasar niadtong Martes, motaas na unya ngadto sa P1,000 ang madawat sa mga BHW matag buwan.

Ang maong laraw gipadayag na ni Mayor Eduardo Gullas niadtong Hulyo.

Nagkanayon si Aznar nga ang mga BHWs maoy usa sa mga importante sa matag barangay tungod kay ang ilang trabaho mao man ang pag-monitor sa panglawas sa ilang mga konstituwente.

Matud niya nga agi og pasalamat sa mga BHW, ilang patas-an ang binuwan nga madawat.

Apan si Aznar ang nipasabot nga dili pa una madawat sa mga BHWs ang umento tungod kay adto pa kini sa sunod tuig malakip sa ipasar nga 2017 annual budget.

Si Gullas niduso og P887 milyones nga budget sa konseho. (BANAT NEWS)