Tillor mag-running clinic na didto sa Baybay City

CEBU, Philippines - Ang Cebuano champion marathoner nga si Noel Tillor moasdang sa Leyte dili alang sa usa ka kompetisyon, kun dili alang sa usa ka mahinungdanong katuyoan nga mao ang pagpaambit sa iyang mga nakat-onan ngadto sa mga sumusulbong ug ingon man mga tadhang runners didto sa Baybay City karong weekend.

Gipasiugdahan sa BC Runners, ang 31-anyos nga si Tillor mopaambit sa iyang nahibaw-an sa saktong pamaagi sa pagdagan ngadto sa maong kahugpongan ug sa mga miyembro niini.

“Isip usa ka ultramarathoner, marathoner, elite runner ug community coach, daku kaayo ko og matabang sa mga nagsugod pa, nakasugod na, ug mga kusgan na sa running,” matud pa ni Tillor nga kaupat makampiyon sa Cebu Marathon.

“Mostly man gud sa mga runners karon kulang sa guidance, kulang sa kahibalo unsa ang saktong pamaagi, unsa ang angay kaunon sa adlaw-adlaw ug unsaon sab nila pagdisiplina sa ilahang self. Ilaha intawon basta nakadagan lang, okay na”

“Almost nine years nako sa running sukad sa akong pagsugod. Seven years nako isip elite and community coach sa running ug for free ug open ni sa tanan. Mao gyud ni akong goal and vision, to share my experience, knowledge in running to all nga willing magpatudlo ug maminaw for the love of sport,” dugang pa ni Tillor.

Human sa orientation karong adlawa, si Tillor mohisgut kabahin sa saktong porma sa pagdagan. Ugma, iyang tukion ang group run ug unsaon paggamit sa mga taktika sa pagdagan.

Ang duha ka adlaw nga kalihukan kabahin sa preparasyon sa BC Runners alang sa labing una nilang full marathon event karong Disyembre 11. (BANAT NEWS)