Bigtime Boxing mobalik sa Coliseum

CEBU, Philippines - Eksplosibong aksiyon sa boksing mobalik sa Cebu Coliseum diin sila si two-time world title challenger Milan ‘El Metodico’ Melindo ug ang managsuong ‘Prince’ Albert ug Jason ‘El Niño’ Pagara maoy mosalida sa giatngan nga binukbukay sa mga Sugbuanon karong Nobiyembre 26.

Human mapakyas duha ka higayon batok sa duha ka Mehikanong bitoon nga sila si Juan Francisco Estrada ug Javier Mendoza, si Melindo (34-2, 12KOs) nanghinaut nga mabuligan sa maayong palad ning higayona sa dihang iyang sangkaon si   Thai champion Fahlan Sakkreerin Jr. (31-4-1, 16KOs) alang sa IBF interim light flyweight title nga maoy main event sa Pinoy Pride 39 nga gipasiugdahan sa ALA Promotions ug ABS-CBN Sports.

Si Melindo nga nagkaproblema sa iyang timbang sa dihang mikulit siya og daog pinaagi sa technical decision batok ni  Maximino Flores sa miagi niyang away niadtong Mayo didto sa Bacolod City, dunay daghan nga iprobar sa iyang away batok ni Sakkareerin  nga  lagmit maoy  magparetiro   kaniya kun  ugaling  siya    mapilde.

Sama ni Melindo, si Albert Pagara nanghinaut sab nga makabawi gikan sa mapait nga kapakyasan pinaagi sa eighth round knockout ngadto sa Mehikanong si Cesar Juarez sa “Pinoy Pride 37: Fists of the Future” niadtong Hulyo 9 didto sa San   Mateo  Events Center sa   San Mateo, California.    Mao   kadto  ang una ug bugtong  niyang pilde sa 27 ka away uban ang 18KOs.

Si Albert naglaraw nga mobalik sa dalan sa kadaugan sa dihang iyang harungon si Raymond Commey sa Ghana, samtang ang iyang maguwang nga si Jason makighamag ni Nicaraguan Jose ‘Quiebra Jicara’ Alfaro sa duha ka non-title bouts nga gikatakda sud sa 10 ka hugna.

Pipila ka mga sumusulbong nga bitoon sa ALA Boxing Gym nga sila si Jeo ‘Santino’ Santisima, Kevin Jake ‘KJ’ Cataraja, Jimmy ‘Popeye’ Paypa, Melvin ‘Gringo’ Jakosalem ug Jonas ‘Zorro’ Sultan ang mopakita sab sa ilang abilidad batok sa wala pa hisayring kontra.

Taud-taud na nga wa’y nahitabong daku nga boxing event sa Cebu Coliseum. Ang katapusan niadto pang Hulyo 26, 2008 diin si AJ ‘Bazooka’ Banal gipatikangkang sa ika-10 nga hugna ni Panamian Rafael ‘El Torito’ Concepcion sa ilang WBA interim super flyweight title showdown. (BANAT NEWS)