Mapapas ang immunity
Kon molusad og imbestigasyon ang International Criminal Court sa dul-an sa 4,000 na ka patayng lawas nga nangligdas sa nagkalainlaing bahin sa nasud tungod sa gubat nga gilusad ni Presidente Rodrigo Duterte batok sa ilegal nga drugas, di makabalibad ni makababag ang gobyerno.
Mahimong moasumir og hurisdiksiyon ang ICC bisan way pormal nga imbitasyon gikan sa Malakanyang. Sakop ang Pilipinas sa ICC busa ubos siya sa hurisdiksiyon sa kalibotanteng korte. Ug di magamit ni Duterte ang iyang presidential immunity from suit sa pagpugong sa ICC sa pagsusi sa iyang responsibilidad sa pagsulbong sa mga kaso sa extrajudicial killings sa Pilipinas sukad sa iyang pagbanos sa Malakanyang.
***
Apan makaangkon lang og sukaranan ang ICC sa pagsusi sa nagtipun-og nga mga kaso sa patay sa Pilipinas kon:
•Maisip ang mga kaso sa patay nga crimes against humanity, o sistematiko nga pagpamatay sa gipanggukod nga mga hut-ong sa populasyon;
•May ebidensiya nga ang mga opisyal ug mga ahensiya sa gobyerno maoy nagpasiugda sa lapad nga pinatyanay; ug
•Kon ang hingtungdan nga mga opisyal ug mga ahensiya sa gobyerno way gihimo sa pagdakop ug pagsilot sa mga responsable sa laktod nga mga pagpamatay.
***
Giklaro na ni Presidente Rodrigo ug sa iyang mga tigpamaba nga ang mga kaso sa patay di maisip nga crimes against humanity kay lehitimo ang gubat batok sa nagkagrabe nga pagkuyanap sa ilegal nga drugas, way labot ang gobyerno sa EJKs nga giimbestigar na sa kapolisan.
Apan silang Senador Leila de Lima ug ang kadagkoan sa Commission on Human Rights nabalaka nga maisip nang crimes against humanity ang mga patay kay niigo sa gipasanginlang mga durugista nga kabos ug gagmay nga way ikapanalipod sa ilang kaugalingon, klaro ang kalambigitan sa mga polis ug pulos pagarpar ra ang mga imbestigasyon sa EJKs kay wa pay nakiha ni nasilotan.
***
Masentro sa kontrobersiya si ICC Chief Prosecutor Fatou Bensouda nga dunay gahom sa pag-imbestigar ug pagkiha sa mga gipasanginlang mga opisyal sa gobyerno sa iyang kaugalingong kabubut-on, o kon awhagon siya og sakop sa nasud, sa United Nations Security Council, o sa Pre-Trial Chamber sa ICC. Naalarma si Bensouda sa kadaghan sa EJKs sa Pilipinas ug nisaad sa pagsunod sa mga panghitabo dinhi.
Si Bensouda, 55, kanhi Justice Minister sa Gambia, napili nga chief prosecutor niadtong 2012 alang sa siyam ka tuig nga termino. Di siya mahudlat og mga balikas ug mga insulto. Kay beterana siya sa pagsusi sa susamang mga kaso. Nagsilbi siyang Legal Adviser ug Trial Attorney sa International Criminal Tribunal for Rwanda sa wa pa mahimong Senior Legal Advisor ug pangu sa Legal Advisory Unit gikan sa Mayo 2002 hangtod sa Agosto 2004.
- Latest
