‘Sextra’ service

Onse ka babaye ang na-rescue sa mga operatiba sa National Bureau of Investigation (NBI)-7 niadtong nakalabay nga adlaw gikan sa gialagaran nila nga mga balay-patigayon sa dakbayan sa Sugbo.

Matud sa mga babaye nga massage therapist ang tawag sa ilang trabaho ug health spa usab ang tawag sa ilang trabahoan.

Apan pantalya lang diay kining tanan sanglit salag diay kini sa mga kalapati nga mubo og lupad.

Nahinabi nako ang usa sa mga naluwas nga babaye kinsa mibutyag nga wala sila’y basic salary nga madawat gikan sa tagdumala sa spa. Makakwarta lang sila kun makakumbinser sila og kliyente nga motukob sa gitawag nila og "sextra service". Gawas sa masahe, ilang ibaligya ang ilang lawas ngadto sa mga customer.

Anaa gani higayon nga dili motukob ang mga lalaki kinsa igo lang gyud magpamasahe, manakit na lang ang ilang mga kamot dili gyud sila hatagan og bisan piso sa tagdumala sa spa. Kini ang nakapatukmod sa mga babaye nga maningkamot nga maka sextra service aron makakuwarta. Matod ni NBI-7 Regional Director Patricio Bernales nga tataw kini nga pagpahimulos o exploitation sa kahuyang sa mga babaye nga maoy usa sa mga elemento sa human trafficking. Nasikop atol sa operasyon ang tag-iya sa prostitution den ug ang manager kinsa gibalhug na sa bilanggoan. Wala sila mohatag og pamahayag mahitungod sa alegasyon batok kanila kay gisalig nila ang tanan sa ilang abogado.

Gipasakaan sila og kasong kalapasan sa Republic Act 10364 o Expanded Anti Trafficking in Person Act didto sa piskalya diin walay girekomendar nga piyansa.

Sa higayon nga moabot kini sa korte ug mapamatud-an silang sad-an pahamtangan sila og silot nga pagkabilanggo sa tibook nilang kinabuhi ug multa nga dili moubos sa P2 milyones. Ingon niini kabug-at ang silot niining salaa. Maayo unta kun dili lang kini ra nga prostitution den ang mapuhag sa mga otoridad tungod kay daghan pa kaayo kining ingon niini nga tinonto apan wala pa lang masakpi.

Murag karon ra man nibalik sa paglihok ang mga otoridad paggukod sa mga kahilayan. Asa na man ang City Anti-Indecency Board (CAIB)? Anaa pa ba sila? Unta nga dili lang ang suliran sa drugas ang tutokan sa kagamhanan tungod kay daghan pa kaayo nga laing mga problema ang nanginahanglan og pagtagad.