Artist’s sketch ng suspek sa Balcoba killing inilabas ng MPD
MANILA, Philippines – Unti-unti nang nagkakaroon ng linaw ang pamamaslang sa mamamahayag na si Alex Balcoba matapos na ilabas ng Manila Police District ang artist’s sketch ng suspek.
Batay sa inilabas na larawan ng suspek sa media, ang lalaking suspect ay nagkakaedad ng mula 40 hanggang 45, may taas na 5’2, medium built ang katawan, may taghiyawat sa mukha, at nakasuot ng sombrero.
Ayon kay Supt. Marissa Bruno, tagapagsalita ng MPD, tatlong testigo ang nagkumpirma sa itsura ng suspek.
Nanawagan ngayon ang MPD sa iba pang nakasaksi sa krimen na makipagtulungan upang mapadali ang pagdakip sa salarin.
Una nang naglaan ng pabuyang P100,000 ang MPD at MPD Press Corps sa sinumang makapagtuturo sa salarin.
Ayon pa kay Bruno, mababa lamang ang probability na may kaugnay sa trabaho ang motibo ng pamamaslang kay Balcoba noong Biyernes ng gabi sa kanyang stall sa Quiapo, Maynila.
Gayunman, sinabi ni Bruno na lahat ng anggulo ay kanila pa ring pinag-aaralan para sa agarang ikalulutas ng krimen.
Ang biktima ay isasalang sa cremation ngayong umaga, Miyerkules, June 1.
Samantala, magtatatag ng special task force si incoming president Rodrigo Duterte na ang tututukan lamang ay ang paglutas sa media killings.
Ito naman ang tiniyak ng tagapagsalita ni Duterte na si Peter Laviña kasunod nang personal na paghahatid ng pakikidalamhati sa pamilya Balcoba.
Ayon kay Laviña, magtatalaga rin ng special prosecutor na ang trabaho lamang ay magbusisi ng mga kaso ng media killings. Aniya, pag-iibayuhin ni Duterte ang proteksiyon ng mga mamamahayag na itinuturing na ika-apat na estado.
Bibigyan ng malaking respeto ang press freedom at ang kalayaan ng mga mamamahayag na gawin ang kanilang trabaho nang walang hadlang at pananakot. Samantala, sinasagot na ng National Press Club of the Philippines ang pag-aaral ng panganay na anak na babae ni Balcoba.
Ayon kay NPC Vice President Benny Antiporda, ang educational assistance para sa anak ni Balcoba ay hanggang sa magtapos ng kolehiyo.
- Latest
