Bag-ong CCMC may private rooms

CEBU, Philippines - Gitataw ni Cebu City Vice Mayor Edgardo Labella nga ang pagamugnaon nga mga private rooms sa gitukod nga bag-ong Cebu City Medical Center (CCMC) gitumong aron paukopahan niadtong mga adunahang pasyente nga makaabot pagbayad.

Matud ni Labella nga tinguha ni suspendidong Mayor Michael Rama nga dili pabayron sa ospital ang mga kabus nga pasyente mao nga ang matigum gikan sa bayad niadtong maka-afford sa private ug air-conditioned rooms magamit sa pag-subsidized sa magasto alang sa mga kabus.

Si acting Mayor Margarita “Margot” Osmeña nakadawat og inpormasyon sa maong mga private rooms diha sa gitukod pa nga bag-ong CCMC.

Bisan si Rama wala kaayo makahatag og tubag mahitungod sa pribadong mga lawak diha sa maong tambalanan apan ingon sa susama ra ang ilang tubag ni Labella.

Wala pa mohatag og baruganan niining maong isyu si incoming Mayor Tomas Osmeña kay daan na siya nga nipahibalo nga itugyan niya sa usa ka konsehal nga iyang kaalyado ang pagdumala sa CCMC.

Hinuon, tinguha ni Osmeña nga sa bag-ong ospital kinahanglan nga ang mga klinika ug opisina sa mga doktor adto ipahiluna sa taas nga mga andana ug dili sa silong nga bahin.

Gusto ni Osmeña nga pulos mga ward ang ibutang sa ground floor aron nga dili maglisud ang mga pasyente nga kinahanglan pa nga mosaka sa mga ward nga tua sa ibabaw.

Napulo ka andana ang desinyo sa bag-ong CCMC nga mogasto og labing minus P1.5 bilyones walay labot sa medical equipment.

Gipaabot nga makompleto paghuman ang maong tambalanan sa 2017. Ang karaang CCMC gipaguba ni Rama kay nakaangkon kini og dakong kadaut sa linog nga niigo sa Sugbo ug Bohol niadtong 2013.

Pagka karon ang gihimong tambalanan sa Dakbayan sa Sugbo mao ang building nga iya sa kabomberuhan ingon man ang building sa kanhi CITOM nga anaa ra duol sa nahimutangan sa karaang CCMC.  (BANAT NEWS)