Gitirahan si Mo!

Manila, Philippines --- Wala man tuod nganli, apan tataw kaayo kinsay buot pasabot sa mga tweets nila ni KC Montero ug sa inahan ni Rhian Ramos, human gipakanaog sa Magic 89.9 ang decision nga suspendido for two weeks sila si Mo Twister ug ang duha ka female DJs nga naglangkob sa morning show sa istasyon.

Tweet ni KC: “I’ve tried before but I just don’t have it in me to take a joke far enough to hurt anyone.”

Tweet ni Lay Ramos: “Anyone, please don’t give Hitler a mic. G, I’m saying Hitler never should have had access to a mic. He mesmerized, persecuted & killed it. Radio, TV or anyone behind any form of media have a responsibility not to give anyone, the likes of him power of public address…ever. I always kid…he who has the mic has the power…but there’s truth to that. Whatever happened to responsible broadcasting?”

Rich ug Angelika perteng sinagpaay

Mingawon si Angelika dela Cruz ni Roseanne Magan sanglit na suod na niya ang bata sa taping sa Biritera ug number one fan sa team-up nila ni Neil Ryan Sese ang bata.. Bilib ang aktres kang Roseanne sanglit bisan og bag-o lang, maayo na nga mu-arte ug tinuod nga hilak ang ipakita niini sa mga eksena.

Tsika pa ni Angelika, sikat sa mga bata si Roseanne gani dihang nag-parade sila sa Malabon, daw santa kini nga gihalaran og mga buwak sa mga batang fans.

Lain pa nga gidayeg ni Angelika si Rich Asuncion nga maayo mu-arte ilabi na sa eksena nga giangkon na niini ang iyang kasal-anan. Nagkasakitay matud pa sila sa ilang eksena ug labihang sinagpaay apan wala gyuy mireklamo.

Samtang subling mag-kontrabida si Angelika sa next soap niyang Kasalanan Ba Ang Ibigin Ka under Mark Reyes. Lakip sa casts sila Michael de Mesa, Sharmaine Arnaiz, Jackie Rice, Jennica Garcia ug Geoff Eigenmann.

Amahan ug anak nagribal kang Jackie!

Gidawat ni Michael de Mesa ang offer nga soap sa GMA-7 ug sigurado nga usa sa mga rason nganong gidawat niya ang Kasalanan Ba Ang Ibigin Ka mao nga makauban niya sa TV for the first time ang anak nga si Geoff Eigenmann.

Dihang nahinabi si Michael sa taping sa Valiente sa TV5, nahisgutan niya ang offer sa Ch. 7, that time, ‘di pa siya sure kung dawaton niya sanglit may mga request siya. Sa pagsulod sa actor sa Kapuso Network, si Andi Eigenmann na lang ang naa sa ABS-CBN. Balitang may bag-ong project na pud si Sid Lucero.

Nindot ang role nila ni Michael ug Geoff sanglit magkaribal sila kang Jackie. Excited si Geoff sa thought nga bantayan sa iyang amahan ang iyang pag-arte busa sigurado nga may makat-onan siya niini.

Lakip sa muhashas si Pilita

Si Asia’s Queen of Songs Pilita Corrales, nga usa ka Sugbuanon, maoy mukumpleto sa mga hurado nga mulingkod alang sa pagpangita sa musunod nga bantugan sa natad sa awit, pinaagi sa X-Factor Philippines sa ABS-CBN. Makauban niya sila si Gary V., Martin Nievera, ug Charice Pempengco. Silang upat muanhi sa Sugbo karong Martes, May 15 alang sa laing hugna sa auditions. Gipaabot nga mahashasan gyud og maayo ang mga manimpad pinaagi sa X-Factor Philippines, gumikan sa mga banggiitang mga hurado nga labihan na ang napamatud-an sa music industry.

Si Pilita mismo, nakahimo na og 135 albums ug natuyok na ang kalibutan aron mupasundayag diin nakauban niya ang mga international artists sama nila ni Sammy Davis Jr., The Beatles, 1966, Bob Hope, Pat Boone, Frank Sinatra ug Julie Andrews. Siya usab ang unang Filipino artist nga midaog sa usa ka international music festival dihang nahimo siya nga Best Performer sa unang Tokyo Music Festival. Tiunay usab nga Kapamilya si Pilita sanglit ang iyang multi-awarded show nga “An Evening with Pilita,” nga nakita sa ABS-CBN gikan 1965-1972, maoy usa sa mga iladong programa sa kasaysayan sa Philippine TV.

Richard nagbitbit sa uyab?

Ang model nga si Girlie Benitez ang tupad ni Richard Gutierrez sa May 8 premiere night sa The Mommy Returns. Pangutana karon, ang model-jewelry designer na ba ang gikatahong uyab karon ni Chard nga non-showbiz?

Standing ovation na pud

Nakadawat og standing ovation gikan sa mga judges si Jessica Sanchez sa iyang “And I Am Telling You” performance sa American Idol kagahapon (Wednesday) didto sa Amerika. Gumikan sa maong performance daghan ang mitag-an nga siya na matud pa ang mugawas nga mananaog niining maong season.

Nina sa Viva

Mipirma og lima ka tuig nga kontrata sa Viva Records si Soul Siren Nina adtong Miyerkules sa gabii. Duna matud pa siyay umaabot nga theater play nga dili pa pwedeng idetalyi pagkakaron.

Tulfo brothers mibakasyon

Sukad adtong Miyerkules, dili ang Tulfo brothers nga sila si Erwin, Ben, ug Raffy ang nag-host sa ilang programang T3 Kapatid, Sagot Kita! sa TV5. "Nakabakasyon" matud pa ang magsuon hangtud karong adlawa, Biyernes. Ang ilang igsuong si Mon Tulfo, kauban nila ni Martin Andanar, ug Atty. Mel Sta. Maria maoy kasamtangang mihulip.

Gwen mihimakak sa isyu

Gisalikway ni 2011 Miss World First Princess Gwen Ruais ang tsika nga matud pa dili maayo ang relasyon nila karon ni 2010 Miss Universe 4th runner-up Venus Raj. Daw managsuon na matud pa sila ni Venus, busa imposibli ang maong intriga.

Tatak Cebuano

Tsika pa ni Buboy Villar nga maantigo gihapon siya mosulti og binisaya bisan pa man nga taud-taud na siya nga nagbase didto sa kaulohan.