Backroom ug mga shows, biyaan ni Boy Abunda

CEBU, Philippines -   Hingpit na nga gipahibawo ni King of Talk Boy Abunda nga iya nang itugyan ngadto sa iyang mga sinaligan ang pagduma sa Backroom Artists, ang talent management agency nga iyang gipundar ug gipalambo sulod sa daghang mga katuigan.

Wala pud siya’y lipod-lipod nga mibutyag nga dili siya magpanuko nga buhian ang iyang mga shows, gawas sa The Buzz, basta gikinahanglan aron makagahin siya og dakong panahon sa iyang inahan nga may dementia.

Ang dementia suma pa sa Wikipedia.com mao ang “serious loss of cognitive ability in a previously unimpaired person, beyond what might be expected from normal aging .” Sa hamubong pagkasulti ang dementia mao ang pagkawala sa memorya gumikan sa katiguwangon. Early stage ni sa Alzheimer’s disease.

Nasayran nga dunay upat ka shows si Boy nga naglakip sa The Buzz, SNN, Bottomline ug Inside Cinema nga makita sa cable. Suma pa niya gihunahuna pa niya hain niining maong mga shows ang iyang biyaan.

Sigurado gyud hinuon siya nga niining tanan, ang The Buzz maoy dili niya buhian sanglit 12 na siya ka tuig niining maong show busa labihan na kadako sa iyang emotional investment niini.

Giklaro hinuon niya nga dili kini hangtud sa hangtud, sanglit mahimo man siya nga mubalik kun maayo na ang iyang inahan nga si Nanay Lesing kinsa mag-83 anyos na.

“Way Back Home” Na

“B” ang rating nga nadawat sa Way Back Home, starring Kathryn Bernardo ug Julia Montes, gikan sa Cinema Evaluation Board. Ang maong pelikula sa Star Cinema showing na karong adlawa.

Wala nay lumot ang dughan

Hugyaw ang tubag ni Kim Chiu sa pangutana kun naka-recover na ba ang iyang kasingkasing human kini nahigugma og half-American: “Oo, pulang-pula na ang puso ko. Pinkish na siya, hindi na kulay lumot.”

Family “Reunion”

Murag “Reunion” nila ni Nora Aunor ug Christopher de Leon ug sa ilang anak nga si Ian de Leon ang mini-serye sa Superstar sa TV5, ang Sa Ngalan ng Ina. Apil na si Ian sa cast isip hulip ni Ryan Agoncillo nga dili na mahinayon tungod sa mga kakulian. Si Ian maoy love interest ni Eugene Domingo sa maong serye ug chief of staff sa gobernador.

Apil pud sila

Kumpirmado na pud nga apil sa “Sa Ngalan ng Ina” ni Nora Aunor sila si Rosanna Roces, Edgar Allan Guzman, Bembol Roco, Rodjun Cruz, Alwyn Uytingco, ug Nadine Samonte.

Marian nauyonan ni Apolinario

Naglibog ang reporter nga si Cesar Apolinario nganong negatibo ang dating ni Marian Rivera, samtang siya nakauyon sa “Primetime Queen” sa GMA-7. Tweet niya kagahapon: “i’ve finally met marian, i find her funny, sweet & honest. Didn’t get why some people think otherwise. Prangka siya & i love that.” (BANAT NEWS)