Daiana magminyo na

CEBU, Philippines - Engaged na matud pa si Daiana Menezes ngadto kang Cagayan de Oro Congressman Benjo Benaldo . Matud pa nga ni-propose ang kongresista ngadto sa aktres didto sa  Eiffel Tower sa Paris niadtong September. Nagplano ang duha nga magpakasal didto sa France ug possible nga mahitabo kini sa unang bahin sunod tuig.

Flames of Love

Makita na sa mga sinehan karong Disyembre 12  ang pelikulang  Flames of Love, usa kini ka family movie nga gibidahan nila ni Christopher de Leon, Rep. Lani Mercado, Dina Bonnevie, Valerie Concepcion, Megan Young, ug Allen Dizon.

EB sa London

Molupad paingon sa  London karong November  15 ang mga Dabarkads sa  Eat Bulaga alang sa show nila sa maong dapit nga ilang gihalad ngadto sa Filipino community. Giingong nag-una na didto sa London ang pipila ka mga staff sa EB alang sa ocular inspection.

Pick-up lines sa party

Karong adlawa ang  first birthday sa  anak nila ni Regine Velasquez ug  Ogie Alcasid. Himoon ang party ni Baby Nate sa clubhouse sa  Ayala Heights Quezon City ug ang bisita kinahanglan nga mopaambit gyud og pick-up lines.

Derek nanawagan sa publiko

Nanawagan si Derek Ramsay sa publiko nga dili tuohan ang migawas nga mga balita nga matud pa iyaha nga giaway ang inahan sa iyang kanhi uyab nga si Angelica Panganiban. Nasagmuyo si Derek gumikan kay nagsagunson ang giatubang niya nga isyu sukad siya nibalhin og TV network.

Lea nagsidlak-sidlak gihapon

Nagpabilin gihapon ang karisma ni Lea Salonga sa publiko gumikan kay sold out ang tickets sa opening night sa God of Carnage. Stage play kini nga gibidahan ni Lea uban sa Singaporean actor nga si Adrian Pang nga gipresentar sa Singapore Repertory Theater.

23 napuno sa listahan

Moabot ngadto sa 23 ka mga tawo ang napuno sa listahan alang sa  Walk of Fame Philippines karong tuiga ug kini gilangkoban nila ni  Angelo Castro, Leroy Salvador, Marilou Diaz-Abaya, Rosa Mia, Dennis Trillo, Pops Fernandez, Ara Mina, Jessa Zaragoza, Nova Villa, Arnold Clavio, Roderick Paulate, Jean Garcia, Rio Locsin, Ronaldo Valdez, Lucy Torres-Gomez, Alma Moreno, Gretchen Barretto, Bea Alonzo, Gov. ER Ejercito, Ricky Lo, Anthony Castelo, Lani Misalucha ug Alfred Vargas .

Ex-talent ni Simon

Naghinam-hinam na pag-ayo si German Moreno sa pag-abot sa usa ka Fil-British talent nga misuwat kaniya aron mangayo og permiso kung puwede ba kini nga mo-guest sa  programa niya nga Walang Tulugan. Kini mao ang  19 anyos nga si  Natalie kinsa naka-guest na kaniadto sa nahisgutang programa upat ka tuig na ang nakalabay. Kanhi talent ni Simon Cowell si Natalie.

Jake gikagubtan sa menteryo

Gidumogan pag-ayo sa mga tawo si Jake Vargas sa dihang mibisita kini sa nipanaw niya nga inahan sa menteryo sa Olongapo City sa miaging adlaw. Gikuyogan na lang  si Jake sa mga tanod aron tulin ang paggawas niini sa menteryo. (Sanden J. Anadia)

Kasal ni Miley tulo ang reception

Gibutyag sa amahan ni  Miley Cyrus nga engrandeng kasal ang mahitabo  sa  pop star ug sa uyab niini nga si Liam Hemsworth.

Suma pa ni Billy Ray Cyrus,  nga hugyaw gyud ang mahitabong  kasal, gani  tulo ang reception nga  giandam sa umaabot nga magtiayon. Kahinumduman nga nahitabo niadtong Hunyo karong tuiga ang pag-anunsyo ni Miley sa planong pagpakasal nila ni Liam.

Una na nga gipadayag ni Miley sa iyang Twitter account  nga tulo ka tuig na ang relasyon ni Liam ug nakaagi na sila og pipila ka mga pagsuway sa kinabuhi busa segurado na sila sa ilang plano nga magminyo. Nagkaila ang duha  gumikan sa panagpares nila sa  pelikula nga "The Last Song" niadtong 2009.

Andrew molupad sa England

Motikang na si Andrew Wolff sa  Kent, England ugma aron morepresenta sa Pilipinas sa  Mr. World competition nga mahitabo na karong November 24. Kahinumduman nga kabahin usab si Andrew sa National Rugby Team kinsa bag-ohay lang nga nalakip sa listahan alang sa 2013 Rugby World Cup.

Aga wala mawad-i og paglaum

Bisan pa man sa mga pagsaway  ug akusasyon nga iyang nadawat,  gipaneguro  sa aktor nga si Aga Muhlach nga magpadayon gihapon ang iyang pagdagan isip kongresista sa Camarines Sur sa piniliay sunod tuig.

Suma pa sa aktor nga wala’y tawo nga makapugong kaniya gumikan kay hagbay ra niya nga gipahimutang ang iyang mga papeles sa wala pa siya mosulod sa politika.

Matud pa ni Aga nga padayon ang iyang  apela kontra sa hukom  sa San Jose Municipal Trial Court (MTC) human giwagtang ang iyang pangalan ug sa iyang misis nga si Charlene Gonzales sa listahan sa mga botante. (BANAT NEWS)