Beermen batok Painters

CEBU, Philippines - Segurado na sila sa playoffs, apan ang defending champion San Miguel Beermen gusto nga modaog batok sa Rain or Shine  Elasto Painters aron makabaton og “twice-to-beat advantage” sa quarterfinals sa PBA Philippine Cup.

Ang Beermen ug Painters magsangka sa main game sa alas-7 sa gabii human sa lahugay sa GlobalPort Batang Pier ug sa   NLEX  Road   Warriors.

Nagbitbit na og 7-1 nga baraha ang Beermen ug kun modaog pa sila karon   segurado na ilang “twice-to-beat” advantage ug ikasangka  nila ang eight o seventh seed sa playoffs nga nagpasabot nga sayon ra alang kanila nga mosulod sa semifinals.

Dili hinuon sayon ang ilang misyon para sa quarterfinals kay sangkaon man nila ang second seed nga Painters nga adunay 5-2 record.

Sa habig sa Rain or Shine, buot sab sila nga mopintal og daog tungod kay mopalapad kini sa ilang kahigayonan magpabilin sa  top two  sa playoffs. Apan kun mapilde mohatag sab kini og kahigayonan sa Alaska Aces, GlobalPort ug TNT KaTropa nga makasulod pa sa top two. Ang tulo ka koponan pulos adunay 4-3 records.

Ang San Miguel modoble hinuon sa ilang paningkamot batok sa Rain or Shine ilabi na nga dili siyento porsiyento ang kondisyon ni three-time MVP JuneMar Fajardo nga may gihambin nga injury sa tiil. (BANAT NEWS)