Probinsiya sa Sugbo subling gipasidunggan sa DILG
CEBU, Philippines - Nakadawat na sab ang kagamhanan sa Probinsiya sa Sugbo og Seal of Good Local Governance gikan sa Department of Interior and Local Government (DILG) sama sa niaging tuig.
Niadtong Huwebes didto sa Manila gidawat ni Gobernador Hilario Davide III ang maong pasidungog sa Sofitel Philippine Plaza atol sa Philippine Local Governance Congress.
Kini gipangulohan nilang DILG Secretary Ismael Sueno, Senador Juan Edgardo Angara ug DILG Undersecretary Austere Panadero.
Sa 1,672 ka local government units lukop nasud, 306 lang ang na-assessed nga nakatuman sa mga criteria sa SGLG.
Ang national government agencies, civil society organizations ug mga pribadong sektor ang niapil sa assessment.
Ang probinsiya makadawat sa performance challenge fund alang sa pag-finance sa mga development projects ug priority rating sa loans and grants assistance.
Si Davide sa iyang bahin nipadayag sa iyang kahinangop tungod kay na-recognized ang ilang mga gihimo alang sa kaayuhan sa probinsiya.
Si Davide nipasalamat usab kang Bise Gobernador Agnes Magpale, mga sakop sa Provincial Board, department heads ug mga kawani sa Kapitolyo nga nahimong malampuson ang ilang programa ug proyekto alang sa kaayuhan sa katawhan sa probinsiya. (BANAT NEWS)
- Latest
