Konseho supak Talisay labayan og basura

CEBU, Philippines - Dakung supak ang konseho sa Dakbayan sa Talisay nga palabayon sa ilang basura ang Siyudad sa Sugbo sa ilang landfill sa Barangay Tapul.

Nipagawas sa iyang panahom si Bise Mayor Alan Bucao human si Mayor Eduardo Gullas niingon nga bukas siya sa posibilidad nga mahimong makalabay sa ilang basura ang Siyudad sa Sugbo diha sa landfill.

Matud ni Bucao nga nagka-estorya gyud sila ni Cebu City Vice Mayor Edgar Labella kabahin sa maong plano apan iya kining gideretso sa pag-ingon nga lisud kini nga mahitabo tungod kay gamay na lang og kuwang nga mapuno na sab ang ilang labayanan ug mosamot ka mubo na unya sa tuig nga mapuno kini kun ila pang tugutan ang laing lugar sa paglabay sa ilang basura.

Samtang si Konsehal Antonio Bacaltos Jr., chairman sa committee on environment, niingon nga kun adunay bag-o nga pasilidad o laing landfill hayan posible sila nga modawat og basura gikan sa laing lugar. Gikatakda nga mopasar  og resolusyon ang konseho sa Dakbayan sa Talisay aron sa pagpagawas sa ilang baruganan nga supak sila sa maong plano. (BANAT NEWS)