Pinakamabilis na solong paglalayag paikot ng mundo, nagawa ng lalaki mula France

KINAILANGAN lamang ng French sailor na si Francois Gabart ng 42 araw at 16 oras upang ikutin ang  mundo sa pamamagitan ng paglalayag mag-isa.

Sa bilis ng kanyang paglalakbay ay mas maikli pa ito ng 6 na araw sa dating world record na naitala ng kababayan niyang si Thomas Coville noong isang taon.

Sinusundan ng mga organizers ng world record attempt ang paglalakbay ni Gabart sa pamamagitan ng GPS satellite at nakumpirma nilang nakatawid na ang 34 anyos na mandaragat sa finish line nang narating na nito ang Ouessant Island sa kanlurang baybayin ng France nito lamang Linggo.

Dose-dosenang mga sasakyang pandagat ang sumalubong sa bangka ni Gabart na binansagan niyang “Macif.”

Inabangan naman siya ng kanyang mga taga-suporta sa kalapit na pantalan ng Brest kung saan niya sinimulan ang kanyang paglalayag noong November 4.

Bagama’t sanay sa pag-iisa ay lubos namang ikinagalak ni Gabart ang naging mainit na pagtanggap sa kanya ng napakaraming mga tao, na walang-sawang tinutukan ang kanyang matagumpay na paglalakbay paikot ng buong mundo.