Isla Paraiso(86)
MASAYANG-MASAYA si Marikit nang umuwi sa kanyang condo unit.
Ngayong sigurado na mayroon na siyang trabaho pagka-graduate niya, mabibigyan na niya ng magandang buhay ang kanyang lolo Kandoy.
Makakaganti na rin siya sa kabutihan ni Sir Alexis. Ibabalik niya kay Sir Alexis ang mga nagastos para sa kanyang pag-aaral. Kung hindi dahil kay Sir Alexis ay hindi makakatuntong sa kolehiyo.
Naipangako rin naman siya sa sarili na pagbubutihin pa ang pagsusulat.
Ang pagsusulat ay isang paglilingkod. Naalala niya ang sinabi ng babaing editor ng diyaryo na mayroon daw siyang ibubuga sa pamamahayag. Iyon ay labis na ikinatuwa niya. Ang mayroong magtiwala sa kakayahan ay nakatutuwa. Ipinagmamalaki niya iyon.
Lalo pa niyang sisipagan ang pagsusulat. Hindi siya titigil sa pagsusulat.
Lalo pa niyang paghuhusayan. Ipakikita niya ang lalo pang pagpupunyagi sa pagsusulat.
NANG mga sandaling iyon, nakarating na sa lugar na target si Hunyango.
Nakatanim sa isip niya ang bilin ni Bossing Jumbo na patayin ang lider ng anti-mining na si Alexis. Isasakatuparan niya ang lahat kapag nakita niya ang lider. Mayroon siyang dalang retrato ni Alexis. Ipinadala iyon sa kanya ni Bossing Jumbo.
Patuloy siyang naglakad. Mga isang oras pa at mararating na niya ang lugar. Humanda ka, Alexis.
PERO nang mga sanda-ling iyon pala ay nalalaman na nina Alexis, ang akitibidad ni Hunyango. Si Bart ang nagsabi na mayroong nalalamang kapangyarihan si Hunyango.
“Kaya ko ang kapangyarihan niya,” sabi ni Bart.
(Itutuloy)
- Latest