Nataypan sa Walt Disney

CEBU, Philippines - Nasurprisa ang singer nga si Kristel Fulgar sa dihang gidayeg sa Walt Disney Studio ang ilang cover video ni  Marlo Mortel sa awit nga Beauty and the Beast. Mao kini ang unang kolaborasyon nila ni  Marlo. “What an absolute stunner, you guys!”, komento pa sa account sa Disney.

Mensahe ni Liza

Nakamatikod ang pipila ka netizens  nga duna gyu’y bug-at nga rason ang Twitter post  ni  Liza Soberano sa miaging adlaw.  Duot sa bukog gyud ang mga pulong nga gibuhian sa aktres mahitungod sa bullying.  “Bullying and humiliating people isn’t cool”, suma pa sa post ni Liza.

Representate sa Pinas

Malipayon ang aktor nga si Daniel Matsunaga gumikan kay nahatagan siya og higayon nga makaduwa sa iyang paboritong sports nga street soccer (futsal). Gani, usa  ang iyang grupo sa  nakasulod sa local qualifiers sa Neymar Jr.’s 5 competition. Lakip na ang 28 anyos nga aktor sa Team Naxional nga mao’y mahimong representante  sa ipahigayong The Neymar Jr.’s 5 World Finals nga mahitabo puhon sa Brazil.

OK ra ni Kath

Komportable ra si Kathryn Bernardo sa pagka-touchy ni Daniel Padilla. Matud pa niya nga naanad na siya sa pagka-touchy ni Daniel bisan og naa sila sa publiko nga lugar.  “Yung pagiging sweet ni DJ ng mga ganyan sa lahat ng tao, sobrang ano niya... Sa halos lahat, very touchy talaga, kahit sa sinuman. Ganyan talaga siya and, sa tingin ko, para secure din ako”, suma pa ni Kathryn.

Proud sa gi-endorso

Dream come true alang sa Kapuso aktres nga si Gabbi Garcia nga mapakita na sa 20 ka nasud ang iyang international endorsement  sa usa ka brand sa shampoo.  Proud matud pa ang aktres sa nagpadayun nga grasya nga iyang nadawat ug siya usab ang nahimong cover girl sa usa ka sikat nga magazine.

Gimingaw sa pag-arte

Positibo gihapon ang aktres nga si Angel Locsin nga maayo ra gyud ang dagan sa iyang karera bisan pa man nga dili na siya madayon sa paglupad isip Darna. Gani, excited na siya gumikan kay makauban niya sa usa ka proyekto ang iyang gihandum nga  magka-loveteam nga sila si Kathryn Bernardo ug Daniel Padilla. Giangkon niya nga gimingaw na gyud siya sa pag-arte atubangan sa kamera busa mapasalamaton usab siya sa dihang nalakip siya sa maong proyekto.

Maayong panglawas

Gisaulog ni Elha Nimpha ang iyang adlaw’ng natawhan sa Magandang Buhay kagahapon. Matud pa ni Elha nga  ang bugtong niya nga   birthday wish , ang himsug nga panglawas sa iyang pamilya ug higala. Dugang pa ni Elha nga unta padayon pa siya nga giyahan sa Makakagahum.

Hangyo ni Jolina

Andam na ang Magandang Buhay host nga si Jolina Magdangal nga makauban sa usa ka pelikula ang iyang kanhi ka-love team nga si Marvin Agustin. Nanghinaot si Jolina nga unta masugdan na  ang iyang gamay nga hangyo gumikan kay gimingaw na siya nga maka-eksena ang aktor. 

Christian mo-perform sa Saudi

Motikang sa Saudi Arabia ang Kapuso singer nga si Christian Bautista karong Abril 7 aron mopasundayag sa  Bayanihan Festival 2017 nga mahitabo sa Cobra Amusement Park sa Damdam. Excited karon ang singer sanglit mao kini ang iyang first trip sa  Saudi. (BANAT NEWS)