2 pintor sa shipyard nangapaso

CEBU, Philippines - Nakabaton og  mga paso sa ilang kalawasan ang duha ka pintor dihang kalit nisilaob ang ilang nahimutangan sa pagdagkot og sigarilyo sa baraderohan sa Looc, Dakbayan sa Lapu-Lapu alas 2:58 sa niaging hapon.

Si Senior Fire Officer 2 Jonhmir Lesigue sa Bureau of Fire Protection (BFP) sa Dakbayan sa Lapu-Lapu niila sa mga biktima nga sila si Gerald Deloseno ug Collin Quirong, pulos hingkod, nagtrabaho isip pintor sa gibaradero nga barko sa Mactan Shipyard Corporation.

Matud ni Lesigue nga ang duha ka pintor padulong na sa ilang break time ug si Deloseno nidagkot og sigarilyo.

Si Deloseno nagbaton og second degree burn ug first degree burn usab ang naangkon ni Quirong ug dali silang gidala sa tambalanan.

Si Lesigue nipahinumdum sa katawhan nga niining Fire Prevention Month likayan gyud ang sunog ug mag-amping sa paggamit sa kuryente ug pagduslit og kayo gamit ang lighter ug posporo. (BANAT NEWS)