Hanap ko ang Pasko

Hanap ko ang Pasko sa mga bintana

Na dati’y may parol na napakagara,

Subali’t wala na ang magandang diwa

Ng Paskong nagdaan sa maraming dampa!

Pasko’y hanap ko rin sa mga tahanan

Na dati’y sagana sa maraming bagay;

Wala na ang prutas, mansanas, dalandan

Puto at kutsinta at saka kalamay!

Nasaan ang Paskong maingay, masaya

Sa paligid-ligid ay di na makita;

At ang Bagong Taong ngayo’y malapit na

Dating kislap nito’y waring naglaho na!