Final stretch na ng kampanya!
Isang linggo na lamang bago ang halalan, kung baga ay nasa mga huling yugto na ang isinasagawang kampanya ng mga kandidato.
Bakbakan na ito nang husto, na ito ang dapat na matutukan ng mga kinauukulan.
Sa ganitong mga panahon, nandito na ang matitinding girian ng magkakabilang panig.
Hindi lang ng mga magkakatunggaling kandidato kundi maging ang kanilang mga supporters.
Dito na madalas na maitala ang karahasan at mga kaguluhan na may kaugnay sa halalan.
Noon lamang nakalipas na Sabado, apat katao ang nasugatan habang masuwerteng nakaligtas ang isang kongresista makaraang sumabog ang bomba habang dumaraan ang convoy nito sa Brgy. Sta. Barbara, Agoo, La Union.
Kasalukuyang dumaraan sa lugar ang convoy ni La Union Congressman Eufranio Eriguel nang sumambulat ang bomba na nakatanim sa kalsada.
Sa nasabing insidente ay sugatang isinugod sa pagamutan ang apat katao na nakasakay sa backup vehicle mula sa kampo ng solon.
Gayunman, sinisilip pa rin kung may kaugnayan sa politika ang insidente.
Patuloy ang imbestigasyon sa kaso kung saan kabilang sa sinisilip na anggulo ay banggaan sa pulitika.
Ilan tumatakbong pulitiko na rin ang naitalang nasawi o nasugatan sa kainitan ng kampanya.
Ilan lang yan sa mga karahasang nagaganap tuwing sasapit ang halalan at dahil nga sa isang linggo na lamang at eleksyon na, dito na mas dapat tumutok ang mga awtoridad lalu na nga sa mga lugar na idineklarang area of concern ng Comelec.
Hindi pa dyan matatapos ang init ng pulitika hanggang sa mismong araw ng eleksyon at hanggang sa bilangan.
- Latest