Para-paraan para trapik, maibsan
Isa sa naisip na paraan ng MMDA sa pakikipagtulungan ng mga mall operators ay ang magpatupad ng “staggered sche-dule” o iba-ibang oras na bukas at sara ng mga mall para umano maibsan ang mas tumindi at titindi pang trapik ngayong buwan ng Disyembre.
Aba’y talaga namang grabe ang trapik, hindi pala, lalu palang grumabe ang trapik.
Ang kahabaan ng Edsa nagmimistulang mahabang parking dahil sa mahabang pila ng naiipit na sasakyan.
Kung gabi naman, haba ng nakapilang sasakyan mistulang Christmas light na kumukutikutitap dahilan sa brake lights.
Kaya nga isa sa nakitang solusyon o pambawas sa kalbaryo ng trapik eh ang iba-ibang oras ng bukas at sara ng mga mall partikular ang nasa kahabaan ng Edsa.
Sa dami raw kasi ng mamimili ngayon lalu na sa susunod na buwan eh lalu pa itong titindi.
Sa staggered schedule, may magbubukas ng maaga na magsasara rin ng maaga, at ’yung late na magbubukas late din na magsasara depende sa napiling oras ng mall operators.
Pero sa Disyembre 24 at 31, sa bisperas ng Pasko at bisperas ng Bagong Taon ay balik sa regular oras (alas-10:00 ng umaga ang bukas at alas-9:00 ng gabi ang sara) ang mga ito.
Samantalang pagsapit ng Disyembre 25 at Enero 1, 2015 ay magbubukas naman ng alas-12:00 ng tanghali at magsasara ng alas-8:00 ng gabi.
Nauna nang ipinasuspinde ng MMDA simula sa Disyembre 15 ang lahat ng konstruksyon o repair sa mga pangunahing lansangan na isa pa sa nagiging dahilan ng trapik.
Dapat ding mabigyan naman ng aksyon o plano ang matindi na namang pagkakabuhul-buhol ng mga trak sa Maynila papuntang pantalan. Ano naman kaya ang pwedeng gawing plano rito?
- Latest