Mariel boses ang pantapat sa bashers!
Maganda naman ang naging guesting ni Mariel de Leon sa Tonight with Boy Abunda. Sana nga ay tuluyan na siyang mapatawad ng kanyang bashers sa pagbibigay ng opinyon sa maraming bagay sa showbiz man o pulitika.
Takot siyang mag-artista dahil hindi ganun kalakas ang confidence niya. Takot din siya na malaman kung hanggang saan lamang ang kakayahan niya bilang artista, pero tinanggap niya ang hamon na humarap sa camera at umarte sa Ang Panday kasama si Coco Martin na siya ring nagprodyus at nagdirek ng movie.
Nagtataka lang ang marami kung bakit hindi siya pinapakanta para sa mga promo ng pelikula gayung magaling daw itong kumanta. Mas madaling makuha ang loob ng maski na ang pinakamalupit niyang kritiko kung dadaanin niya ito sa musika.
JM tinulungang lumaya ni Jennylyn
Trending sa Facebook ang isang microfilm na nagtatampok kina JM de Guzman at Jennylyn Mercado. Naka-dalawang araw pa lamang ito ng pagpapalabas, pero umaani na ito ng 3.2 million views, 113,000 likes, at mahigit 65,000 shares. Dahil sa napakagandang chemistry na nakita sa dalawa, marami ang humihiling na sana naman ay mapanood sila sa isang pelikula.
Inaasahang mas papatok pa ang 10 minutong palabas lalo’t matagal nang nami-miss si JM. Naunahan pa nitong mapanood ang entry ng Quantum Films sa Metro Manila Film Festival (MMFF) 2017 na All Of You na nagtatampok kina Jennylyn at Derek Ramsay.
Paano nga naman hindi magugustuhan ang maikling paoorin na may pamagat na Malayang Pasko, eh isang love story ito tungkol sa struggles ng isang couple matapos maghiwalay. Ginawa ito ng Acer Philippines para sa dalawang pinakabago nilang ambassador at kasama sa holiday campaign.
Bong naghahanap na ng kapalit
Malamang na sa walang tigil na pagdarasal ni Sen. Bong Revilla ay maaabsuwelto ito sa kasong isinampa sa kanya at tuluyan nang makakawala sa kanyang pagkakapiit. Kung ang kapwa niya pulitiko at artista na si Sen. Jinggoy Estrada ay pinayagang makalabas na, malaki ang pag-asa niya na makamit din ang kaparehong treatment sa korte.
Samantala, sa kabila ng kalungkutan ng kanyang pamilya ay napapabuti pa ni Lani Mercado ang kanyang gawain bilang mayor ng Bacoor, Cavite. Magkakasunod na taon nang tumatanggap ang Bacoor ng pagkilala for good governance and environmental compliance mula sa DILG at Dept. of Tourism.
Sa kabila ng absence ng padre de familia, nagsimula na ng paghahanda ng isang pelikula na magtatampok sa tatlong anak na lalaki ng mga Revilla/Bautista, sina Bryan, VG Jolo at Luigi Revilla. Gustong makita ng mga magulang nila kung sino pinakakarapat-dapat na sumunod sa yapak ni Bong bilang action star.
Hinihintay ng Imus Production ang paglaya ni Sen. Bong para masimulan na ang opisyal na paggawa ng nasabing movie.
- Latest