School feeding program gipasar sa House

CEBU, Philippines - Giaprubahan na sa House of Representatives ang House Bill 5269 nga nagtinguha sa pag-institutionalized sa National School Feeding Program alang sa mga tinun-an sa kindergarten ug elementarya sa tanang publikong tunghaan sa nasud.

Tuyo niini nga kapanalipdan ang kabataan nga nagtungha gikan sa mga  epekto sa malnutrition ug aron mapalambo ang ilang pagkat-on. Si Kongresista Raul del Mar sa Dakbayan sa Sugbo, ang nangamahan sa balaudnon, nagkanayon nga may kabataan nga moadto sa tunghaan nga wala’y pamahaw maong dili makasabot sa itudlo gumikan sa giantos nga kagutom.

Matud ni del Mar nga ang maong balaudnon ipatuman kini sa tanang publikong tunghaan kay kasagaran nga nag-eskwela dinhi gikan sa mga pobreng pamilya ug nag-antos sa kakuwang sa pagkaon nga maoy babag sa pagkab-ot sa saktong pagkat-on.

Si Parolita Mission, regional program nutrition coordinator sa National Nutrition Council-7, nagkanayon nga suportado nila ang maong balaudnon.

Ang Department of Education mao ang ahensiya nga mangulo sa implementasyon sa maong programa.

Ang maong balaudnon nagmando usab sa pagmugna og Child Feeding and Nutrition Committee (CFNC) nga maoy magmugna sa school-based feeding ug nutrition framework.

Ang pagpamalit, paghipos ug pagluto sa pagkaon dumalahon sa DepEd inubanan sa NNC ug ubang ahensiya.

Dugang ni del Mar nga kung adunay pagkuwang sa budget, ang prayoridad sa implementasyon sa NSFP adto ihatag sa mga publikong kindergarten ug elementarya nga nahimutang sa mga munisipyo ug siyudad nga taas ang malnutrition base sa pag-identify sa NNC.  - /GMR) (BANAT NEWS)