Pacquiao-Horn fight napirmahan na

MANILA, Philippines - Kagaya ng naunang pahayag ni Bob Arum ng Top Rank Promotions, ang pirma na lamang ni Manny Pacquiao ang kailangan para maitakda ang kanilang bakbakan ni Australian contender Jeff Horn.

Sinabi kahapon ni Arum na lumagda na ang Filipino world eight-division champion sa fight contract para harapin si Horn sa Hulyo 2 sa Brisbane, Australia.

At ilang bagay na lamang ang kailangang plantsahin ni Arum para sa pagdedepensa ng 38-anyos na si Pacquiao ng kanyang suot na World Boxing Organization welterweight crown kontra sa 29-anyos na si Horn.

“We’re slowly finishing up the deal to fight … people have agreed on essential points,” wika ni Arum sa panayam ng The Times mula sa Washington.

Ang Australian promoter ni Horn ang kinakausap ngayon ng bantog na promoter.

“Paperwork takes time, particularly when it’s not the usual thing of getting it done in the United States. We’re dealing with an Australian promoter, the state government,” ani Arum. “Here, in this case, you’ve got to cross the T’s and dot the I’s, and that’s what we’re in the process of doing.”

Nauna nang inihayag ni Arum ang bakbakan nina Pacquiao (59-6-2, 38 KOs) at Horn (16-0-1, 11 KOs) ngunit naghanap pa si Michael Koncz, ang Canadian adviser ni ‘Pacman’ ng malaking premyo.

Isang investment group sa United Arab Emirates ang nangako kay Pacquiao na magbibigay ng premyong $38 milyon para labanan si Amir Khan (31-4-0, 19 KOs) sa Dubai.

Ngunit nang walang maipakitang pondo ang naturang UAE group ay muling ipinanukala ni Arum kay Pacquiao na sagupain si Horn.

Gagawin ang salpukan nina Pacquiao at Horn sa 55,000-seater na Suncorp Stadium sa Brisbane, Australia.

“There’s nobody objecting to the deal. Everybody is moving ahead to get it done,” wika ni Arum.