EDITORYAL - Kinsa’y kakunsabo

Sayon kaayo sabton kun ngano nga padayong makasulod diha sa mga bilanggoan ang mga butang kontrabando, sama sa ilegal nga drugas ug kahimanan sa kumunikasyon.

Dili katuohan ang sagad nga pangangkon sa mga tinugyanan sa bilanggoan nga kadtong mga tawo nga gustong mopayuhot og butang kontrabando, moitsa lang niini gikan sa gawas sa kural paingon sa sulod sa prisohan.

Adunay mga jail guards nga gidestino kanunay sa ibabaw sa kural sa bilanggoan aron nga moaninaw sa ubos, apil na sa gawas nga bahin sa kural. Kun tinuod pa nga gikan sa gawas ang shabu ug igo lang giitsa paingon sa sulod, ngano nga wala man kini mabantayi sa mga tower guards?

Kun tuohan nimo nga ang kontrabando nga shabu nakasulod sa Cebu City Jail ug sa Cebu Provincial Detention and Rehabilitation Center (CPDRC) kay giitsa ra ug wala mabantayi, ingon ba usab niini ang matang sa pagpasulod sa mga laptop, telebisyon ug mga cellphones?

Kataw-anan kaayo ang maong rason sa mga tinugyanan sa bilanggoan ug tingali mga bata ra nga walay buot ang motuo kanila. Buot ba nila nga ipasabot nga ang mga laptop, cellphones ug ubang electronics gadgets ilabay lang gikan sa gawas sa bilanggoan paingon sa sulod sa compound?

Kun tuohan man kining ilang pamahayag, mohatag kini og kalibog kun ngano nga wala man makakita ang mga tower guards, o ang mga guwardiya nga nagbantay sa mga tower. Masabot ba nga ang mga tower guards maoy kakunsabo sa mga durugista nga nagpalusot og drugas ug electronics gadgets sa bilanggoan?        

Ang nindot nga buhaton sa kadagkoan sa bilanggoan, sama ni Gobernador Hilario Davide Jr. ug sa kadagkoan sa Bureau of Jail Management and Penology (BJMP) nga kun may masakmit nga shabu sa prisohan, angay dayon nga hulipan ug imbestigahon ang mga warden aron sila moigmat sa ilang katungdanan.