2 ka motorsiklo nagsungag, 1 patay
CEBU, Philippines - Gumikan sa panagsungag sa duha ka motorsiklo sa Dakbayan sa Danao niadtong miaging kadlawon, usa ang namatay ug duha ang naangol.
Nahitabo ang insidente pasado alas 3 sa miaging kaadlawon sa national highway sa Barangay Tuburan Sur sa nahisgutang siyudad.
Si Traffic Officer Paulino Lingues sa Dakbayan sa Danao miingon nga basi sa imbestigasyon nga gihimo ni PO2 Romil Costan, ang namatay nailhan nga si Jayboy Almacin, nagpuyo sa nahisgutang dapit.
Samtang ang iyang backrider nga si Kim Ryan Gian nga iyang silingan ang grabeng naangol ingon man ang nagmaneho sa gikasungag niining motorsiklo nga si Christian Plaza nga taga Barangay Lawaan sa mao gihapong dakbayan.
Matud ni Lingues, gikan sa Brgy. Poblacion silang Almacin ug Gian dihang pag-abot nila sa lugar nahitaboan, gilikayan niini ang nag-parking nga Isuzu Elf hinungdan nga nagbangga sila kang Plaza.
Gumikan sa kakusog sa impact, parehong nangalamba sa sementadong karsada ang mga biktima.
Dugang ni Lingues daling gihatod sa Danao Provincial Hospital ang mga biktima apan si Almacin nga nakabaton og grabeng kadaut sa iyang kalawasan, gideklarar sa mga doktor nga dead on arrival.
Samtang silang Plaza ug Gian gibalhin sa ilang mga kabanay sa Vicente Sotto Memorial Medical Center sa Dakbayan sa Sugbo alang sa dugang pa nga pag-atiman sa mga doktor kanila. (BANAT NEWS)
- Latest