Martinez sasabak na sa aksyon sa Asian Winter Games

MANILA, Philippines -  Pipilitin ni Filipino Olympic figure skater Michael Martinez na sapawan ang limang contenders sa 21-man pack sa freeskate climax sa Asian Winter Games sa Sapporo ngayon.

 Tumapos sa No. 7 ang 20-anyos na si Martinez sa short program sa kanyang career-high na 76.53 points sa Makomanai Arena noong Biyernes.

Si Australian Brendan Kerry ang kumuha sa No. 5 ngunit hindi siya eligible para sa medalya dahil ang kanyang bansa ay isang guest team sa event na may 21 skaters mula sa 12 nasyon.

Nangingibabaw naman si Jin Boyang ng China na nagtala ng 92.86 points kasunod sina Japanese Shoma Uno (92.43), Chinese Yan Han (91.56), Japanese Ta­kahito Mura (90.32), Kerry, South Korean Kim Jin Seo (76.99), Martinez, Uzbekistan bet Misha Ge (76.18), Kazakhstan skater Denis Ten (72.98) at Malaysian Julian Zhi Jie Yee (72.75).

 Naging impresibo si Martinez, No. 37 sa International Skating Union (ISU) world ladder base sa resulta sa nakaraang tatlong taon at inungusan sina No. 12 Ten at No. 20 Ge. 

Ang kanyang naunang pinakamataas na iskor sa short program ay 74.45 points sa Golden Spin of Zagreb sa Croatia noong 2014. 

Naging surprise skater naman si No. 44 Kim na tumaas sa No. 6 spot, habang si Filipino Jules Alpe (42.38 points) ay nahulog sa No. 17.

 Sa women’s division, nawala sina Filipina Samantha Cabiles at Sahayan Casapao sa top 10 sa short program. 

Umupo si Cabiles sa No. 14 sa kanyang 28.54 points, habang nasa No. 18 si Casapao sa ipinosteng 24.33 points. 

May 25 female competitors mula sa 14 bansa.