Tulo sikop sa buy-bust sa PDEA, NSG

CEBU, Philippines - Nasikop sa mga sakop sa Philippine Drug Enforcement Agency (PDEA-7) ang tulo ka lalaki atol sa buy-bust operation kauban ang Naval Security Group-Central sa Sitio Engineering, Basak Pardo, Dakbayan sa Sugbo.

Ang nasikop naglakip sa managsuon nga Jeffrey Pinili, 26, kinsa maoy subject sa buy-bust, Arwin Pinili, 27, ug Ryx Domenique Delfinado, 25, pulos residente sa maong lugar.

Matud sa tigpamaba sa PDEA-7, Leia Albiar, usa ka concerned citizen ang nitaho ngadto sa Barangay Anti-Drug Abuse Council (BADAC) may kalabutan sa presensiya sa drug den sa maong lugar.

Nasuta nga balido ang taho hinungdan nga gipahigayon ang operation ug nakuha ang unom ka gramos sa gituohang shabu nga mobalor og dul-an sa P18 mil ug pipila ka drug paraphernalia.

Giandam na sa PDEA-7 ang mga dokumento alang sa pagsang-at og tukma nga kaso karong Lunes. (BANAT NEWS)