1M pirma vs Bitay Bata Bills

CEBU, Philippines - Gilusad kagahapon dinhi sa Sugbu ang “1-million Signature Campaign” batok sa Batang Bilango  Bill ug Death Penalty Bill nga  gibansagang “Bitay Bata Bills” gitambungan sa mga nagkadaiyang militanteng grupo, simbahan, academe ug ni Kongresista Tom Villarin sa Akbayan Partylist.

Matud pa ni Villarin, ang 1million signatures dili lamang symbolic kung dili aron sa pagpalihok sa mga tawo   pinaagi sa educational campaign kung nganong dili kinahanglang ibalik ang death penalty ug nganong dili angayan bilanggoon ang mga bata.

Sumala pa ni Villarin ang mga kabataan angay sa eskwelahan o kaha sa rehabilitation center ug dili sa prisohan tungod kay sila maoy paglaom sa nasud.

Ang 1 million signature gisugdan niadtong katapusan nga buwan sa Enero ug nakatigom na sila og 100 mil ka pirma,ug malaumon silang ini’g abot sa Mayo 1 makab-ot nila ang tinguha nga gidaghanong pirma.

Dugang pa ni Villarin, adunay lihok karon sa kongreso, aron mapasar ang death penalty, dunay mga pagpanghulga nga nahitabo, sama sa dili paghatag og mga chairmanship sa mga komitiba, apan daghan sa mga supermajority congressmen ang nipakita og pagsupak sa death penalty bahala mawagtangan og committee chairmanships.

Si Villarin nipadayag, nga kung mapasar gyud sa kongreso ang death penalty malaumon gihapon siyang padulong ra kini sa archive ini’g abot sa Senado tungod kay daghan sa mga sakop niini ang dili pabor sa pagbuhi pagbalik niini.

Malipayon si Villarin, nga ubay-ubay sa mga kongresista sa Sugbo ang dili gusto sa death penalty.

Si Jonah Nuñez sa Forge Group, nitug-an nga dili angay pakubsan ang criminal liabilities sa mga kabataan tungod kay dili pa andam ang kagamhanan ug wala man gani hustong pasilidad sa pagkakaron nga nitabang sa mga batang nakasala sa balaod.

Dugang pa ni Nuñez, dili sila pabor sa death penalty kay kadto ra gihapong mga pobre ug walay mga sala ang mapahamtangan niini.

Karong adlawa ang mga militanteng grupo adunay ipahigayon nga lakaw nga gitawag og Stop Batang Bilango Bill and Love Life. (BANAT NEWS)