Lihok na mo uy!

Nangita diay kuno si Mayor Tomas Osmeña og tawo nga katugyanan gyud niya sa pagdumala sa City Hall Clearing team, ang Prevention Restoration Order and Beautification Enhancement (PROBE).

Buyno, higayon na kini alang niadtong mga tawo nga adunay tinguha nga mahapsay ang atong dakbayan sa Sugbo pinaagi sa paghawan sa atong mga aseras ug ubang mga publikong lugar.

Klaro kaayo nga wala modayeg si Osmeña sa nagdumala karon sa PROBE team kay bisan ako, makapanglingo-lingo nga magtan-aw sa mga aseras nga duol ra kaayo sa City Hall nga daghan kaayong makabalda sa imong paglakaw.

Kon dili unta kaya ang trabaho, mobalibad lang unta kay sa pagpaalig-alig, unya dili diay makahimo. Wala gani sila makabadlong sa pipila ka namaligya og imahen sa mga santos diha sa dalan D. Jakosalem nga miabot na sa karsada.

Tungod niini, ang mga tawo mapugos na sa paglakaw diha na gyud sa agianan sa mga sakyanan ug peligro na nga sila madam-agan. Suheto kaayo ko niini kay anaa ko mag-agian diha.

Kamo sab unta nga mga naninda og imahen, pagbaton sab tawon mo'g kaikog uy.

* * *

Sa ako na nga giingon sa mga nangagi nako nga lindog, nangandoy gyud ko nga may makuha si Mayor Osmeña og tawo nga susama og baruganan ni Bayani Fernando, kadtong kanhi pangulo sa Metro Manila Development Authority (MMDA) nga walay kukahadlok nga mobungkag sa mga illegal nga structures nga nakababag sa pag-agi sa mga tawo diha sa aseras.

Wala ko magpasabot nga wad-on na lang gyud sa hingpit ang mga naninda ug nanginabuhi diha sa aseras, apan kinahanglan nga sila han-ayon pag-ayo aron dili makasamok sa pag-agi sa mga tawo.  Ang aseras gituyo sa pagmugna alang sa mga tawo nga mangagi, ug dili para sa mga manindahay. Ang nagdumala sa PROBE team angay unta nga mobuka sa iyang mga mata ug motan-aw kon hain ang angay'ng aksyonan. Apan wala nila kini himoa.

* * *

Ikaduha, kinahanglan nga ang nagdumala sa Cebu City Transportation Office (CCTO), ang kanhi CITOM, mobalik gayud sa pagmugna og kaugalingon niini nga clearing team nga moaksyon diha-diha sa mga nagbabag sa aseras.

Kini aron nga dili na kamo magsalig pa sa mga sakop sa PROBE team nga walay klaro ang serbisyo. Awhagon nako si higalang Isko Ouano, ang bag-ong operations chief sa CCTO, nga mugnaon niya pagbalik ang CCTO clearing team.

Unya, ayaw na nianang inyong baruganan nga abi kay ang obstruction anaa man sa aseras, dili kana inyong responsibilidad. Hunahunaa nga apektado gihapon ang trapiko kon ang mga tawo dili na makaagi sa aseras kay anha na man sila sa karsada maglakaw.

Tungod niini, mopahinay gyud ang mga drayber kay basin og macadam-ag sila sa mga naglakaw na sa karsada. Unta, mahinuktokan kini sa akong higala nga si Isko Ouano. 

* * *

Daygon nako ang mga sakop sa Task Force Alpha (TFA), dili tungod kay kauban mi, apan tungod sa walay pagkapuol nila nga serbisyo bisan og walay sweldo aron pagtabang nga hapsay ang dagan sa atong mga sakyanan.

Nakunsensya na gani ko kay sukad sa pagbalik og operate sa TFA wala pa gyud ko makasalmot pagbalik sa ilang operation tungod sa lahi na nga matang sa akong trabaho pagka karon.

Apan bisan og wala ko nila ikauban sa pagdumala sa trapiko diha sa mga "busy" kaayo nga karsada, wala malilong kanako ang ilang makugihon nga serbisyo. Akong lauman nga dili gayud unta mapul-an ang akong mga kauban sa pagserbisyo sa publiko.

Kada hapon gayud nga ang mga sakop sa TFA, anaa sa mga karsada nagserbisyo nga walay sweldo. Mao nga awhagon nako ang mga motorista nga mohatag sa ilang pagrespito sa mga volunteer traffic enforcers.