Anti-smoking ordinance usbon
CEBU, Philippines - Giduso ni Konsehal Raymond Alvin Garcia ang pag-amendar sa City Ordinance No. 2241 kon ang Comprehensive Anti-Smoking Ordinance sa Dakbayan sa Sugbo.
Anaa na sa committee on laws ang giduso nga ordinansahon alang sa dugang pagtuon.
Usa sa giduso nga kausaban ni Garcia ang pag-umol og task force nga mopatuman sa ordinansa nga pangulohan sa mayor isip chairperson, city administrator isip vice chairperson ug mga sakop ang city legal officer, city health office, city engineer ug uban pa.
Kung maaprubahan, ang mga establisemento kinahanglang adunay smoking area nga bukas kanunay ug dili mominus sa 10 ka metros ang gilay-on sa entrance ug exit.
Ang tumong sa pag-amendar sa maong ordinansa mao ang pagsanong sa Executive Order ni Presidente Rodrigo Duterte nga mag-ban sa pagpanigarilyo sa mga pangpublikong lugar.
“This is very much pattern after the Davao City ordinance, in fact if you look at the penalties here it is mas taas compared sa penalties sa Davao ordinance,” matud ni Garcia.
Kahinumduman nga si Mayor Tomas Osmeña niingon nga makadaut sa turismo kung hingpit gyud nga mapatuman ang pag-ban sa pagpanigarilyo sa pangpublikong lugar.
Apan alang sa konsehal mas importante ang panglawas sa mga tawo kaysa sa turismo.
Hinoon gipaabot nga usa ka public hearing ang himoon aron usab mapaminaw ang habig sa mga establisemento mahitungod niini. (BANAT NEWS)
- Latest