Timex 3-0 na sa Aboitiz Football Cup
CEBU, Philippines - Ang Timex mipakgang sa Accenture, 3-0, aron pag-angkon sa solong liderato sa BPO-ladies division sa 18th Aboitiz Football Cup didto sa Paref-Springdale School field kagahapon.
Si Guillerma Belda maoy midagkot sa kayo sa opensiba sa Timex human siya naka-iskor sa nakaon nga walo pa lamang ka minuto sa duwa.
Sila si Mailyn Lozano ug Patricia Duazo mihansak dayon og duha ka sunod-sunod nga goals sa 14th ug 22nd aron pagtuboy sa Timex sa ikatulo niining sunod-sunod nga daog.
Sa laing duwa, ang United Health Group milampaso sa Lexmark, 5-0, aron pag-inat sa ilang baraha ngadto sa duha ka daog ug usa ka tabla.
Si Roselle Mendoza maoy nangu sa birada sa UHG human naka hat-trick sa 10th, 24th ug 31st. Ang laing nakapuntos mao sila si Nenette Lanza sa 17th ug Genevieve Suyko sa 37th.
Samtang ang Lear FC wa sab magpabitin human gipayukbo niini ang Convergys, 3-1. Si Tricia Lamberto maoy unang naka-goal sa Lear sa 26th ug gisundan kini nilang Jona Mae Acosta sa 30th ug Clyve Pahugot sa 33rd.
Sa inter-company division, ang ERCO mipakaging sa GBPO, 10-1.
Didto sa Don Bosco Technology Center, ang Paref Springdale miposte og 4-1 nga kadaogan batok sa Cebu International School, samtang ang University of San Carlos way kaluoy nga minglatos sa Danao FC, 16-0. EBV (BANAT NEWS)
- Latest
