Guiao gusto kuhaon si Lee

Gitug-an ni NLEX Road Warriors coach Yeng Guiao nga paningkamotan niya nga makuha niya pagbalik isip player si Paul Lee kinsa nahimo niyang sinaligan dihang nag-uban pa sila sa Rain or Shine Elasto Painters.

Sama ni Guiao, si Lee nawagtang na usab sa Painters human ma-trade ngadto sa Star Hotshots bugti ni veteran James Yap. Si Guiao nagkanayon nga gusto niya nga mahimo og player balik si Lee kinsa iyang nakita nga epektibo sa iyang sistema.

NBA ring ihatag sa amahan

Isip pahinungod sa iyang amahan, si Cleveland Cavaliers star Kyrie Irving muhatag sa iyang NBA championship ring ngadto sa iyang amahan nga si Drederick Irving.

Kini isip pasalamat sa gibuhat sa iyang amahan nga maoy miagak kaniya sa iyang karera sa basketball. Ang tibuok Cavs gitakdang mudawat sa ilang tagsa-tagsa ka mga sing-sing atol sa ilang opener sa 2015-2016 NBA season.

Vargas muhagit ni Peping

Suwayan ni Association of Boxing Alliances in the Philippines president Ricky Vargas nga mahulipan sa pwesto ang dugay nang Philippine Olympic Committee president nga si Jose 'Peping' Cojuangco.

Si Vargas mamasin nga maoy mahimong bag-ong POC president sa himuong eleksyon sa Nobiyembre 25.