Phinma/SWU batok Opto/CIT-U

CEBU, Philippines - Laraw sa Phinma/Southwestern University Cobras nga pahugtan ang pagkupot nila sa ikaduhang dapit sa liderato sa dihang ilang sangkaon ang My Led Opto/Cebu Institute of Technology-University Wildcats sa  8th Cebu Schools Athletic Foundation, Inc. (CESAFI) Partner’s Cup karong adlawa diha sa Cebu Coliseum.

 Ang Cobras ug Wildcats magpinaksitay sa alas-7  sa gabii, inig kahuman sa pasiunang duwa tali sa Mighty Sports/University of San Jose-Recoletos Jaguars ug Highlands Corned Beef/University of Cebu Webmasters sa alas-5:15 sa hapon.

Ang Cobras lab-as pang mihaw-as gikan sa 78-68 nga kadaugan batok sa Webmasters nga maoy hinungdan nga nagsolo sila karon sa ikaduhang puwesto bitbit ang 3-1 win-loss record sunod sa 5-0 nga Worthy/University of the Visayas Green Lancers.

Sa laing bahin, ang Jaguars ug Webmasters naglaraw nga buk-on ang 2-2 nga panagtabla nga naghigot nilang duha sa ikatulong dapit sa liderato. (BANAT PALARO)