Valdez-less Bali Pure susubukan ang Air Force
MANILA, Philippines – Sisimulan ng Bali Pure ang kampanya nito laban sa Philippine Air Force sa pagpapatuloy ng Shakey’s V-League Season 13 Open Conference ngayong hapon sa The Arena sa San Juan City.
Magtutuos ang Bali Pure at Air Force sa alas-4 kasunod ang duwelo ng Laoag at Iriga sa alas-6.
Nakatakda naman ang pukpukan ng Cignal at Bounty Fresh sa ala-una ng hapon sa nag-iisang laro sa Spikers’ Turf.
Lalarga ang Bali Pure nang wala sina three-time UAAP MVP Alyssa Valdez, NCAA MVP Gretchel Soltones at Alyssa Eroa na kasalukuyang nasa Europa para sa ilang exhibition game doon.
Sasandalan ng Bali Pure sina playing coach Charo Soriano kasama sina Denden Lazaro, Dzi Gervacio, Bea Tan, Amy Ahomiro, Janine Marciano, Karla Bello at Ivanah Agbayani.
“We haven’t really practiced as a team so we expect it to be a little challenging in our first few games. Hopefully, we could be complete soon and start to be competitive,” ani Soriano.
Nakalista rin sa lineup ng Bali Pure sina dating Ateneo stars Ella de Jesus at Jem Ferrer subalit wala pang katiyakan kung makalalaro ang mga ito dahil wala pang pahintulot mula sa kanilang mother team na PLDT.
Ang Air Spikers naman ay pamumunuan nina Judy Caballejo, Joy Cases, Iari Yongco, Mae Crisostomo, May Ann Pantino at Jennifer Manzano.
Sa kabilang banda, umaasa ang Laoag Power Smashers na makabangon mula sa kanilang nilasap na 21-25, 25-20, 23-25, 21-25 kabiguan sa kamay ng National University sa opening day noong Sabado. (CCo)
Kasalukuyang magkasalo sa unahan ng standings ang NU at Pocari Sweat tangan ang 1-0 rekord.
- Latest
