Marlo nasagasaan sa pagpasok ni Elmo
Ngayong isa nang Kapamilya si Elmo Magalona, dito ngayon masusubukan kung gaano katibay ang relasyon nila ni Janine Gutierrez na naiwan sa Kapuso network lalupa’t kay Janella Salvador na siya ipapareha.
Ngayong ipapareha na si Janella kay Elmo, nangangahulugan kaya na goodbye na ang tambalang Janella Salvador at Marlo Mortel na unang nagkasama sa Be Careful with My Heart at nasundan ng OMG!?
Sina Janella at Marlo rin ang mga pangunahing bituin sa MMFF movie na Haunted Mansion ng Regal Films na dinirek ni Jun Lana.
Bea at John Lloyd hindi talaga matibag
Nasabik ang mga tagahanga ng tambalan nina John Lloyd Cruz at Bea Alonzo dahil dinagsa ng mga manonood ang kanilang balik-tambalan sa pelikulang A Second Chance na dinirek ni Cathy Garcia-Molina na siya ring nag-direk ng kanilang 2007 hit movie na One More Chance.
Ang tambalan nina John Lloyd at Bea ay maihahalintulad sa successful pairing noon nina Vilma Santos at Christopher de Leon na kahit walang naging romantic relationship sa tunay na buhay ay sinuportahan ng mga manonood. If our numbers are correct, mahigit 20 pelikula ang pinagtambalan noon nina Vi at Boyet.
Naniniwala pareho sina John Lloyd at Bea na hindi kailangang magkarelasyon para maging matagumpay ang isang tambalan tulad sa kanilang dalawa.
Itong pattern din kaya ang sinusundan nina James Reid at Nadine Lustre na magkaibigan lamang ang turingan hanggang ngayon?
Mga Pinoy tuloy ang pag-ariba sa mga Int’l scenes
Hindi talaga maitatatwa ang husay ng mga Pinoy sa larangan ng iba’t ibang talent na kaya nilang ipamalas maging sa ibang bansa.
Tinututukan ng mga Pinoy all over the world ang 4th Impact na binubuo ng Cercado Sisters sa tumatakbong X-Factor (UK) kung saan ay pasok na sila sa Top 5 sa British-dominated reality singing competition.
Muling nakuha ng isang Filipino-Australian ang grand prize sa katatapos pa lamang na X-Factor (Australia) na si Cyrus Villanueva. Pinay din ang naging grand winner last year (2014) sa nasabing patimpalak sa katauhan ni Marliza Punzalan.
Of course, hindi rin makakalimutan ang paglutang ng caregiver na si Rose Fontanes bilang grand winner ng X-Factor (Israel).
Fresh din sa isipan ng mga Pinoy ang pagkakapanalo ng grupong El Gamma Penumbra sa kauna-unahang Asia’s Got Talent na ginanap sa Singapore kung saan din lumutang ang husay ng iba pang Filipino performers tulad nina Gerphil Flores, Gwyneth Dorado at maging ang dance group na Junior New System.
- Latest