Vic pinaligaya nang husto si Pauleen
Kung kay Vic Sotto na mismo nanggaling ang pagpapakasal nila ng girlfriend niya na si Pauleen Luna, aba, eh dapat na itong paniwalaan. Hindi naman ang bossing ng Eat Bulaga ang tipo na magsasalita para lang makakuha ng media mileage. Kung siya nga ang masusunod, ayaw niyang ipagmakaingay ang mga pribadong bahagi ng kanyang buhay.
Pero para na rin siguro kay Pauleen kung kaya minarapat na niyang magsalita. Ikinatuwa ito ng nobya niya kaya masaya itong umalis patungong Amerika para sa isang personal na kadahilanan. Suot-suot na nito ang kanyang engagement ring na may bigat na tatlong kilatis. Sasamantalahin na rin nito ang pagkakataon para bumilii ng kanyang wedding gown na kung hindi ginawa ni Vera Wang ay ni Monique Lhuiller.
Isang simpleng kasal lamang ang inihahanda ng dalawa na maninirahan sa bahay na ipinatayo ni Vic para sa kanilang dalawa pagkatapos ng kasal.
Star Wars bibida sa Pasko ng SM Malls
Hindi nakaagaw ng eksena sa inanunsyong partnership ng Walt Disney Company at SM kundi nakaambag pa nang malaki sa naging promosyon ng partnership nila ang naging performance nina Morisette Amon, Rhap Salazar, Mandaluyong Children’s Choir, at ng Manila Symphony Orchestra sa Something Magical Event na ginanap sa SM MOA Arena nung Miyerkules ng hapon. Napakaganda ng ginawa nilang programa para sa lahat ng manonood ng mga Disney movies. Hindi lamang sa mga sinehan puwedeng maganap ang SM Cinema at Disney experience kundi maging sa mga bahay sa pamamagitan ng kalulunsad lamang na Blinkapp.
Hindi masasabing masuwerte lang ang Pilipinas na ang SM ang pinili ng Disney na maka-partner sa Asya. Talagang karapat-dapat tayo sa magandang pagkakataon na ipinagkakaloob nila dahil walang tatalo sa mga Pinoy sa ginagawa nating pagsuporta sa mga palabas ng Disney, sa mga sinehan man o TV.
Unang ilulunsad ng SM at ng Disney ang Star Wars Galactic Christmas para sa pormal na pagpapalabas ng Star Wars: The Force Awakens. Isa itong exhibit na magpapakita ng mga life size figurines ng mga character mula sa pelikula, interactive games, at mga produkto mula sa SM Stores at Toy Kingdom. Abangan ito sa mga piling SM Supermalls.
Ang launching ay dinaluhan ng pamilya ng mga Sy, sa pangunguna ni G. Hans Sy, Pangulo ng SM Prime Holdings. Inc., Edgar Tejerero, Pangulo ng SM Lifestyle Entertainment, Inc., Rob Gilby, Managing Director ng Walt Disney Co. Southeast Asia, at Paul Canland, Pangulo ng Walt Disney, Asia.
Claudine hindi namimili ng lalaki
Si Piolo Pascual pala ang makakapareha ni Claudine Barretto sa kanyang first teleserye para sa Kapamilya. Hindi naman ito masama dahil tinanggap nang maganda ang pagpapareha ng dalawa sa Milan. At si Claudine yata ang nag-iisang babaeng artista na tinatanggap ng manonood, mapa-pelikula man o TV, kahit na sino ang kapareha.
Hindi ba maganda rin ang naging pagsasama nila ni Aga Muhlach at maging ni John Lloyd Cruz? Bagay siya sa lahat ng lalaking artista kaya hindi siya mahirap hanapan ng proyekto. Matatapos na ang shooting nila ng Etiquette For Mistresses kung saan ay puring-puri ni Kris Aquino ang kanyang performance.
Showtime kailangan ng matitinding segment
Katulad ng hosts ng Eat Bulaga, hindi naman nalalayo si Vice Ganda sa kanyang pang-ookray sa mga humihingi ng payo sa kanya para sa kanilang mga problema sa It’s Showtime. Ganun din naman sina Vic Sotto at Joey de Leon na inookray din naman kadalasan ang mga napipili nilang bigyan ng kabuhayan sa Juan For All, All For Juan. Ang kaibhan lamang nila ay nagbibigay ng pera at mga kabuhayan ang hosts ng EB, samantalang payo lamang at kung susuwertihen ay natutulungan din ni Vice ang mga may problema.
May effort din ang It’s Showtime na makipagsabayan sa EB, pero talagang phenomenal ang kanilang Bulaga Pa More at kalyeserye. Kailangan pa ng It’s Showtime ng matitinding segment para makaagapay sa EB.
- Latest